Европа комиссияси раҳбари Урсула фон дер Ляйен АҚШ президенти Дональд Трамп томонидан жорий этилган божларни бутун дунё бўйлаб бизнес ва истеъмолчиларга жиддий зарба деб атади.
Европа жавоб беришга тайёр. Биз ҳар доим манфаатларимиз ва қадриятларимизни ҳимоя қиламиз. Шу билан бирга, ҳамкорликка ва қарама-қаршиликдан музокараларга ўтишга тайёрмиз, деб ёзди Урсула фон дер Ляйен ўзининг Х саҳифасида.
У Трампнинг глобал савдо тизимидаги камчиликлар туфайли баъзилар “адолатсиз фойда” олаётгани ҳақидаги позициясига қўшилишини ва уни ҳозирги воқеликка мослаштириш учун саъй-ҳаракатларни қабул қилишга тайёрлигини айтди. Бироқ, тарифлар тизимни “тузатишга” ёрдам бермаслигини маълум қилди.
Еврокомиссия раҳбари АҚШ томонидан жорий қилинган пўлат ва алюминий божлари сабабли Евроиттифоқ жавоб чораларини якунлаётганини маълум қилди. Шунингдек, музокаралар барбод бўлса, Европа ўз манфаатлари ва бизнесларини ҳимоя қилиш учун қўшимча қарши чоралар кўриб чиқади.
12 мартдан бошлаб Трамп Европа иттифоқидан 28 миллиард долларлик пўлат ва алюминий импортига 25 фоизлик божлар жорий этилди. Фон дер Ляйен шу куни Европа иттифоқининг 26 миллиард долларлик “кучли, аммо мутаносиб” қарши чораларни жорий этиш қарорини эълон қилди.
Трамп Ўзбекистон товарларига ҳам бож солмоқда
2 апрель куни Трамп ўнлаб мамлакатларга нисбатан “ўзаро” божлари жорий этилишини ҳам эълон қилди. Европа иттифоқи учун тариф 20 фоизни ташкил этади. Чора 9 апрелдан кучга киради. АҚШ президенти жами 185 та давлат, жумладан, Ўзбекистон товарларига (10 фоиз) ҳам божлар жорий этди. Бироқ кўплаб давлатлар учун тарифлар юқорироқ бўлиб чиқди.
Хусусан, Хитойдан келадиган товарларга божлар 34 фоизни, Европа иттифоқи мамлакатларидан 20 фоизни, Швейцариядан 31 фоизни, Исроилдан 17 фоизни, Қозоғистондан 27 фоизни ташкил этади. Вьетнам (46 фоиз), Камбожа (49 фоиз), Лаос (48 фоиз) энг юқори тарифларга эга бўлди. АҚШ президенти ҳатто одамлар яшамайдиган Херд ва Макдоналд оролларига ҳам бож жорий этди. Бу оролларда минглаб пингвинлар мавжуд. Трамп енгил автомобиллар, юк машиналари ва уларнинг эҳтиёт қисмлари импортига 25 фоизлик божлар жорий этиш тўғрисидаги фармойишни ҳам имзолади.
Изоҳ (0)