Toshkent shahrining Shayxontohur tumanida bozordan qaytayotgan ayolning tilla zanjirini o‘g‘irlab ketgan 20 yoshli yigit ushlandi. Bu haqda poytaxt IIBB matbuot xizmati xabar berdi.
Maʼlum qilinishicha, “Chorsu” bozoridan uyiga qaytayotgan nafaqadagi keksa ayolga 20 yoshli yigit avtobusdan tushganidan so‘ng qo‘lidagi yuklarni ko‘tarishib, yordam berishini aytgan.
Narsalarni ko‘tarib kelayotgan yigit ko‘p qavatli uy podyezdida ayolning tilla zanjirini kuloni bilan birga yulib olib, hodisa joyidan qochib ketadi.
O‘tkazilgan tezkor tadbir natijasida ushbu jinoyatni sodir etgan 2005-yildan tug‘ilgan shaxs IIO xodimlari tomonidan qo‘lga olindi. Gumonlanuvchi olib qochgan tilla zanjirni zargarlik do‘koniga kirib, 4,6 mln so‘mga sotib yuborgan.
“Avvalroq Toshkentga kelgandim. Ko‘chada yashab yurdim. Keyin avtobusda xolani ko‘rib qoldim. Bo‘ynida tillasi bor edi. Orqasidan borib, bekatda tushdim. Qo‘lidagi sumkalarni ko‘tarishib yubordim. 2-qavatga chiqqanda bo‘ynidagi tillasini yulib qochdim. O‘sha kuni tilla do‘koniga ko‘zim tushdi. O‘sha yerga kirib, tillani sotdim. Uyga ketayotganimda esa ichki ishlar xodimlari ushlashdi”, deydi gumonlanuvchi.
Mazkur holat yuzasidan Jinoyat kodeksining 166-moddasi 2-qismi “a” bandi (talonchilik hayot va sog‘liq uchun xavfli bo‘lmagan zo‘rlik ishlatib yoxud shunday zo‘rlik ishlatish bilan qo‘rqitib) bilan jinoyat ishi qo‘zg‘atilib, tergov harakatlari olib borilmoqda.
Gumonlanuvchiga nisbatan qamoq ehtiyot chorasi qo‘llanilgan.
Izoh (0)