Namangandagi umumiy ovqatlanish shoxobchasida 3 mlrd so‘mlik gazdan noqonuniy foydalanildi
Yoqilg‘i-energiya resurslaridan noqonuniy foydalanish bilan bog‘liq holatlarni fosh etishga qaratilgan nazorat tadbirlari davom etmoqda. Bu haqda Bosh prokuratura matbuot xizmati xabar berdi.
Foto: Bosh prokuratura matbuot xizmati
Maʼlum qilinishicha, Namangan shahridagi “M.I.S.” MJCH rahbari va boshqalar jamiyatga qarashli umumiy ovqatlanish shoxobchasini tabiiy gaz tarmog‘iga o‘zboshimchalik bilan ulangan.
Oqibatda 3 mlrd so‘mlik tabiiy gazni yashirin ravishda talon-toroj qilgan.
Foto: Bosh prokuratura matbuot xizmati
Mazkur holat bo‘yicha jamiyat rahbari B.J., jamiyat ish boshqaruvchisi S. va “Namanganshahargaz” gaz taʼminoti bo‘limi sobiq gazchisi O.P.ga nisbatan Jinoyat kodeksining 169-moddasi (o‘g‘irlik) 4-qismi “a” bandi bilan jinoyat ishi qo‘zg‘atilib, gumonlanuvchilar protsessual tartibida ushlangan.
Energiya resurslaridan noqonuniy foydalanish holatlari ortib bormoqda
O‘zbekistonning turli hududlarida energiya resurslaridan noqonuniy foydalanish holatlari aniqlanmoqda. Ushbu holatlarning aksariyatida miqdor mlrd so‘mdan ortiq. Xususan, Sirdaryoda 683 mln so‘mlik “svet”dan noqonuniy foydalangan shaxs ushlangan edi.
Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi. Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi.
Bundan tashqari, Angrendagi metan zapravkada 1,1 mlrd so‘mlik elektr energiyasidan noqonuniy foydalanilgani aniqlangan.
Izoh (0)