Fransiyaning Pare-le-Monial kommunasidagi muzeydan qurollangan shaxslar milliy boylik sifatida tan olingan zargarlik buyumlarining bir qismini o‘g‘irlab ketdi. Mazkur zargarlik buyumlarining taxminiy narxi 7 million yevroni tashkil qiladi.
Bu haqda AFP xabar bermoqda.
Kommuna meri Jan-Mark Nesmening so‘zlariga ko‘ra, 1904-yilda parijlik zargar Jozef Xomet tomonidan yaratilgan, Gieron muzeyining asosiy eksponati bo‘lgan Via Vitae (lotincha “hayot yo‘li”) buyumlari o‘g‘irlangan. Kompozitsiya olmos va boshqa qimmatbaho toshlar, marmar, oltin va fil suyagidan yasalgan elementlar bilan bezatilgan 138 ta figuradan iborat.
Zargarlik buyumlarining o‘g‘irlanishi 21-noyabr kuni tushdan keyin sodir bo‘lgan. Talonchilikni to‘rt kishi amalga oshirgan. Avvaliga ular havoga o‘q uzgan, so‘ng zargarlik buyumlari saqlanadigan oynali javonga o‘q otib, uni teshgan.
U yerdan oltin va fil suyagidan yasalgan haykalchalarni, shuningdek, zumrad bilan bezatilgan taqinchoqlarni olib, mototsikllariga o‘tirib qochib ketishgan.
“Bu Pare-le-Monial va mamlakat merosi uchun katta yo‘qotish”, dedi mer agentlikka.
O‘g‘irlik vaqtida muzeyda 20 ga yaqin tashrif buyuruvchilar va muassasa xodimlari bo‘lgan, ular jabrlanmagan.
Hozirda talonchilarni aniqlash va ularni qo‘lga olish harakatlari amalga oshirilmoqda.
Joriy yilning avgust oyida ijtimoiy tarmoqlarda O‘zbekiston davlat sanʼat muzeyining taʼmir uchun yopilishi ortidan qimmatbaho asarlarning sotuvi boshlangani aytilgan xabarlar tarqalgandi.
Manzarachi rassom, rangtasvir ustasi O‘rol Tansiqboyev muallifligidagi surat tarmoqlarda 756 million so‘mga baholangan bo‘lsa, italiyalik rassom asari 37 millionga sotilishi mumkinligi maʼlum qilingan.
Madaniy meros agentligi holatga izoh berar ekan, “muzey taʼmiri va suratlarning sotuvga chiqishi o‘rtasida bog‘liqlik yo‘q”ligini maʼlum qilgan.
Izoh (0)