Toshkentda 7,5 mlrd so‘mlik “svet”dan noqonuniy foydalangan paxtani qayta ishlash sexi aniqlandi
Energiya resurslarni talon-toroj qilinishini fosh etishga qaratilgan nazorat tadbirlari davom etmoqda. Bu haqda Bosh prokuratura matbuot xizmati xabar berdi.
Foto: Bosh prokuratura matbuot xizmati
Maʼlum qilinishicha, Toshkent shahrining Yashnobod tumanidagi “K.I.” MCHJ rahbari R.I. paxtani qayta ishlash sexini tarmoqqa noqonuniy ravishda ulab, jami 7,5 mlrd so‘mlik elektr energiyasini o‘g‘irlagan.
Mazkur holat yuzasidan jamiyat rahbariga nisbatan Jinoyat kodeksining 169-moddasi (o‘g‘irlik) 4-qismi “a” bandi bilan jinoyat ishi qo‘zg‘atilib, gumonlanuvchi protsessual tartibda ushlangan.
“Svet”dan noqonuniy foydalanish holatlari
Jizzaxda 1,1 mlrd so‘mlik “svet”dan noqonuniy foydalangan shaxs ushlangani, bundan tashqari, uchta viloyatda jami 628 mln so‘mlik “svet”dan noqonuniy foydalanish holatlari aniqlangani haqida xabar berilgandi.
Avvalroq Sirdaryoda 683 mln so‘mlik “svet”dan noqonuniy foydalangan shaxs ushlangan edi. Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi.
Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi. Angrendagi metan zapravka 1,1 mlrd so‘mlik elektr energiyasidan, Samarqanddagi metan zapravkada 6,6 mlrd so‘mlik gazdan noqonuniy foydalanilgani aniqlangan.
Izoh (0)