Xalqaro qidiruvda bo‘lgan shaxs Misrdan O‘zbekistonga ekstraditsiya qilindi, deb xabar qilmoqda “Dunyo” axborot agentligi.
Unda keltirilishicha, Interpolning O‘zbekistondagi Milliy markaziy byurosi xodimlari tomonidan o‘g‘irlik va katta miqdorda tovlamachilik jinoyatlarini sodir etganlik uchun xalqaro qidiruvga berilgan O‘zbekiston fuqarosi T.X.M. Misrda ekani ma’lum bo‘lgan.
Ushbu shaxs Misr hududida bir muddat talabalik maqomida yashirinib yurgan. Joriy yil yanvar oyida Interpolning Qohira shahridagi ofisi va Misr huquqni muhofaza qilish idoralari bilan birgalikda o‘tkazilgan tezkor tadbir davomida qo‘lga olingan.
Bundan avval Rossiya Qozog‘istonga 7 mln dollarlik firibgarlik ishida gumonlanayotgan o‘zbekistonlik ayolni ekstraditsiya qilgani haqida xabar berilgandi. Shuningdek, O‘zbekistonda bir yildan ortiq vaqt qidiruvda bo‘lgan fuqaro Qozog‘istonda qo‘lga olingan edi.
Shu bilan birgalikda, Qozog‘istonda 10 yildan ortiq xalqaro qidiruvda bo‘lgan O‘zbekiston fuqarosi ushlangani xabar qilingandi.
Izoh (0)