Yoqilg‘i-energiya resurslaridan noqonuniy foydalanish bilan bog‘liq holatlarni fosh etishga qaratilgan nazorat tadbirlari davom etmoqda. Bu haqda Bosh prokuratura matbuot xizmati xabar berdi.
Maʼlum qilinishicha, Sirdaryo viloyati Mirzaobod tumanidagi “S.T.A.M” MCHJ rahbari S.B. jamiyatga qarashli ekin yerlarini sug‘orish uchun mo‘ljallangan suv nasosini o‘zboshimchalik bilan tarmoqqa ulashi oqibatida 683 mln so‘mlik elektr energiyasi talon-toroj qilingan.
Mazkur holat yuzasidan Jinoyat kodeksining 169-moddasi (o‘g‘irlik) 4-qismi “a” bandi bilan jinoyat ishi qo‘zg‘atildi.
Dastlabki tergov davomida jamiyat tomonidan yetkazilgan 683 mln so‘m zarar to‘liq undirilishi taʼminlandi.
Avvalroq Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi.
Shuningdek, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi.
Bundan tashqari, Angrendagi metan zapravka 1,1 mlrd so‘mlik elektr energiyasidan, Samarqanddagi metan zapravkada 6,6 mlrd so‘mlik gazdan noqonuniy foydalanilgani aniqlangan.
Izoh (0)