AQSH Ichki xavfsizlik vazirligi (IXV) muhojirlarni Amerika immigratsiya qonunchiligini buzishdan ogohlantirish maqsadida bir necha million dollarlik reklama kampaniyasi boshlanganini e’lon qildi.
IXV saytida ko‘rsatilishicha, bir qator video e’lonlar radio, televideniye va raqamli formatda ko‘plab mamlakatlar hamda mintaqalarda turli tillarda efirga uzatiladi.
Idora o‘zining YouTube’dagi kanalida ikkita videorolik e’lon qildi: birinchisi AQSH chegarasini allaqachon kesib o‘tib, mamlakatda noqonuniy bo‘lib turgan odamlarga qaratilgan bo‘lsa, ikkinchisi esa mamlakat tashqarisidagi odamlarni bundan ogohlantiradi.
Ichki xavfsizlik vaziri Kristi Noem videomurojaatida prezident Donald Trampga “chegaralar xavfsizligini ta’minlagani, jinoyat sodir etgan noqonuniy muhojirlarni mamlakatdan chiqarib yuborgani va Amerikani birinchi o‘ringa qo‘ygani uchun” minnatdorlik bildirgan.
Prezident Tramp agar siz bu yerda noqonuniy bo‘lsangiz, biz sizni topishimiz va deportatsiya qilishimiz haqida ma’lum qilgan. Siz hech qachon AQSHga qaytmaysiz, deyiladi IXVning birinchi videosida.
Ikkinchi videoda Noem AQSHga noqonuniy kirish imkoniyatini ko‘rib chiqayotgan odamlarni ogohlantirib, mamlakatga kelib, Amerika qonunchiligini buzganlarni ta’qib qilishga va’da bergan.
Siyosatchi o‘z murojaatida, shuningdek, “uzoq vaqt davomida chegarani keng ochib qo‘ygan zaif siyosatchilarni” ayblab, bu giyohvand moddalar savdosi, jinoyatchilikning o‘sishi va odam savdosi bilan bog‘liq muammolarga sabab bo‘lganini aytgan.
Agar hozir ketsangiz, kelajakda qaytish, erkinligimizdan zavqlanish va Amerika orzusini ro‘yobga chiqarish imkoniyatiga ega bo‘lishingiz mumkin. Amerika o‘z qonunlarini hurmat qilganlarni olqishlaydi, deyiladi murojaatda.
Reklama kampaniyasi yangi ma’muriyatning migratsiya siyosatini kuchaytirish bo‘yicha keng ko‘lamli sa’y-harakatlarining bir qismidir. Xususan, yanvar oyi oxirida prezident Donald Tramp Venesueladan kelgan muhojir tomonidan o‘ldirilgan 22 yoshli talaba qiz xotirasiga atalgan Leyken Rayli qonunini imzoladi. Qonun IIVdan o‘g‘irlik va zo‘ravonlik jinoyatlarida gumon qilingan noqonuniy muhojirlarni, garchi ularga rasman ayblov qo‘yilmagan bo‘lsa ham, hibsga olishni talab qiladi.
Shuningdek, avvalroq prezident Guantanamodagi Amerika harbiy bazasida AQSHda noqonuniy bo‘lib turgan muhojirlarni saqlash uchun markaz ochishni buyurgandi. Markaz 30 minggacha kishini qabul qila oladi.
Izoh (0)