Qoraqalpog‘istondagi oshxonada 1,5 mlrd so‘mlik “svet”dan noqonuniy foydalanilgani ma’lum bo‘ldi
“Energiya resurslarini talon-toroj qilinishini fosh etishga qaratilgan nazorat tadbirlari davom etmoqda”, deb xabar berdi Bosh prokuratura matbuot xizmati.
Foto: Bosh prokuratura matbuot xizmati
Maʼlum qilinishicha, Qoraqalpog‘iston Respublikasi To‘rtko‘l tumanidagi “Ch.Z.” oilaviy korxonasi ish boshqaruvchisi oshxonani elektr tarmog‘iga noqonuniy ravishda ulab, jami 1 mlrd 523 mln so‘mlik elektr energiyasini o‘g‘irlagan.
Mazkur holat yuzasidan Jinoyat kodeksining 169-moddasi (o‘g‘irlik) 4-qismi “a” bandi bilan jinoyat ishi qo‘zg‘atilib, gumonlanuvchi protsessual tartibda ushlangan.
Dastlabki tergov davomida yetkazilgan zarardan 550 mln so‘mini qoplanishi taʼminlandi.
Energiya resurslaridan noqonuniy foydalanish holatlari ortib bormoqda
Bugunga qadar O‘zbekistonning turli hududlarida energiya resurslaridan noqonuniy foydalanish holatlari aniqlanmoqda. Ushbu holatlarning aksariyatida miqdor mlrd so‘mdan ortiq.
Jumladan, Sirdaryoda 683 mln so‘mlik “svet”dan noqonuniy foydalangan shaxs ushlangan edi. Shuningdek, Sirdaryodagi maishiy xizmat ko‘rsatish shoxobchasida 325 mln so‘mlik “svet”dan noqonuniy foydalanilgani aniqlangandi.
Shu bilan birga, Qoraqalpog‘iston Respublikasi va Toshkentda jami 2 mlrd so‘mlik “svet”dan noqonuniy foydalanilgani haqida xabar berilgan edi.
Angrendagi metan zapravkada 1,1 mlrd so‘mlik elektr energiyasidan noqonuniy foydalanilgani aniqlangan.
Izoh (0)