Тошкент шаҳрининг Шайхонтоҳур туманида бозордан қайтаётган аёлнинг тилла занжирини ўғирлаб кетган 20 ёшли йигит ушланди. Бу ҳақда пойтахт ИИББ матбуот хизмати хабар берди.

Маълум қилинишича, “Чорсу” бозоридан уйига қайтаётган нафақадаги кекса аёлга 20 ёшли йигит автобусдан тушганидан сўнг қўлидаги юкларни кўтаришиб, ёрдам беришини айтган.
Нарсаларни кўтариб келаётган йигит кўп қаватли уй подъездида аёлнинг тилла занжирини кулони билан бирга юлиб олиб, ҳодиса жойидан қочиб кетади.
Ўтказилган тезкор тадбир натижасида ушбу жиноятни содир этган 2005 йилдан туғилган шахс ИИО ходимлари томонидан қўлга олинди. Гумонланувчи олиб қочган тилла занжирни заргарлик дўконига кириб, 4,6 млн сўмга сотиб юборган.
“Аввалроқ Тошкентга келгандим. Кўчада яшаб юрдим. Кейин автобусда холани кўриб қолдим. Бўйнида тилласи бор эди. Орқасидан бориб, бекатда тушдим. Қўлидаги сумкаларни кўтаришиб юбордим. 2-қаватга чиққанда бўйнидаги тилласини юлиб қочдим. Ўша куни тилла дўконига кўзим тушди. Ўша ерга кириб, тиллани сотдим. Уйга кетаётганимда эса ички ишлар ходимлари ушлашди”, дейди гумонланувчи.
Мазкур ҳолат юзасидан Жиноят кодексининг 166-моддаси 2-қисми “а” банди (талончилик ҳаёт ва соғлиқ учун хавфли бўлмаган зўрлик ишлатиб ёхуд шундай зўрлик ишлатиш билан қўрқитиб) билан жиноят иши қўзғатилиб, тергов ҳаракатлари олиб борилмоқда.
Гумонланувчига нисбатан қамоқ эҳтиёт чораси қўлланилган.
Изоҳ (0)