Rossiya Federatsiyasining Sankt-Peterburg shahrida daydilik tarixiga bag‘ishlangan “bomj”lar muzeyi ochildi. Bu haqda “RIA Novosti” xabar bermoqda.
Muzeyga faqat ekskursiya guruhlari tarkibida tashrif buyurish mumkin. Chiptalar sotuvidan olingan mablag‘lar xodimlarning ish haqini to‘lashga va og‘ir vaziyatga tushib qolgan odamlarni qo‘llab-quvvatlashga yo‘naltiriladi.
Muzey ekspozitsiyasida qadimgi davrdan XX asr oxirigacha bo‘lgan turli tarixiy davrlarni qamrab olgan uysiz odamlarning hayot tarzi namoyish etilgan. Muzeyda beshta personajni uchratish mumkin: X asrda Rusni xristianlashtirish davridan so‘ng Quddusga sayohat qilgan darbadar kalika; Pyotr I davridagi qochqin sibirlik mahbus; XIX asrdagi tungi boshpana yashovchisi, shuningdek, SSSR va 1990-yillardagi uysizlar.
Muzey asoschilari ta’kidlashicha, zallarda asosiy eksponatlardan tashqari, moddiy va ma’naviy qadriyatlarni o‘zida mujassam etgan buyumlar namoyish etilmoqda. Bir yildan ortiq davom etgan eksponatlarni to‘plash turli yo‘llar bilan amalga oshirilgan. Ekspozitsiya doimiy ravishda o‘zgarib, rivojlanib boradi.
Shuningdek, muzeyda kino ko‘rsatuvlari, fotosuratlar ko‘rgazmasi va mavzuli ma’ruzalar kabi ma’rifiy tadbirlar uchun maydon vazifasini o‘taydi. Unda turli soha mutaxassislari uysizlik muammosini yoritadilar. Bundan tashqari, hikoyalar o‘qish va uysizlik qiyinchiliklarini yengib, yangi hayot boshlagan insonlar bilan uchrashuvlar o‘tkazish rejalashtirilgan.
“Hozircha chipta narxi kishi boshiga 650 rublni tashkil etadi. Bu summaga ekskursiya xizmati ham kiritilgan. Bu ma’lum ma’noda xonalarimiz to‘liq jihozlanmagani, masalan, hali to‘liq garderob yo‘qligi uchun chegirmadir. Ikki haftadan so‘ng, hamma narsa tayyor bo‘lgach, narxni 850 rublgacha oshirishni rejalashtirmoqdamiz”, dedi muzey tashkilotchisi Andrey Borodin.
Borodinning aytishicha, tashrif buyuruvchilar uchun chegirmalar tizimi o‘rnatilmagan, biroq urush faxriylaridan birortasi ekspozitsiyani ko‘rmoqchi bo‘lsa, bepul kirishi mumkin.
Izoh (0)