Buxoroda 4 dona qadimiy tangalarni olib chiqib ketmoqchi bo‘lganlar ushlandi

Buxoro viloyati aeroportida 4 dona qadimiy tangalarni olib chiqib ketmoqchi bo‘lgan shaxslar ushlandi, deb xabar bermoqda viloyat Bojxona qo‘mitasi. 

Ma’lum qilinishicha, Buxoro viloyati bojxona boshqarmasining Buxoro aeroporti chegara bojxona posti orqali qadimiy numizmatika buyumlarini olib chiqib ketishga bo‘lgan urinish bartaraf etildi. Unda Buxoro—Vnukovo yo‘nalishidagi aviareys orqali xorijiy davlatga uchib ketayotgan ikki nafar fuqaro o‘zi bilan Respublika hududidan olib chiqib ketish ta’qiqlangan madaniy meros ashyolarini olib chiqishga uringan vaqtda bojxona xodimlari tomonidan to‘xtatib qolindi. 

Bartaraf etilgan ikki holatda jami 4 dona qadimiy tangalar borligi aniqlandi. Ashyoviy dalil sifatida vaqtincha saqlovga olingan tangalarning qadimiylik darajasini aniqlash maqsadida Buxoro viloyati madaniy meros boshqarmasi tomonidan badiiy ekspertiza o‘tkazildi. 

Unga ko‘ra, mazkur tangalar 1751-yilda Rossiya imperiyasining I imperatori Pyotr I hukmronligi davrida Yekaterinburg zarbxonasida zarb etilgani tasdiqlandi. Hozirda ushbu qadimiy numizmatika ashyolari doimiy saqlash uchun Buxoro davlat muzey-qo‘riqxonasiga taqdim etildi.