Qozog‘iston hukumati mamlakatda “etnosiyosiylashtirilgan ramzlar” tasvirlangan tovarlarga taqiq joriy etish masalasini ko‘rib chiqmoqda — gap “Vagner” xususiy harbiy kompaniyasining ramzlari va Z yoki V belgilari haqida bormoqda. Bu haqda “Otamakon” respublika tadbirkorlar milliy palatasiga tayanib, “Nur.kz” nashri xabar berdi.
Ushbu taklif bilan Respublika Bosh prokuraturasi chiqqan. Idora matbuot kotibi Kuat Bapinovning so‘zlariga ko‘ra, “turli etnik guruhlarning alohida vakillari jamoat maydonlarida turli etnik belgilarni namoyish etmoqda”. Xususan, 2022-yilda Rossiya va Ukraina o‘rtasida urush boshlanganidan so‘ng Qozog‘istonda kiyim-kechak, mashina va o‘yinchoqlarda Z yoki V belgilari tez-tez namoyish etilmoqda; chakana savdo tarmoqlarida Rossiya armiyasi ramzlari tushirilgan tovarlar reklama qilinyapti va sotilyapti, bu esa jamiyatda turli salbiy reaksiyaga sabab bo‘lgan.
Prokuratura hukumatga “qurolli to‘qnashuvlarda, boshqa davlat suvereniteti va siyosiy rejimiga qarshi harbiy yoki boshqa zo‘ravonlik harakatlarida” qarama-qarshi tomonlar qo‘llaydigan ramzlar tushirilgan mahsulotlarni Qozog‘iston hududida ishlab chiqarish, olib kirish, tashish va tarqatishni taqiqlashni, buning uchun ma’muriy javobgarlik belgilashni taklif qildi.
Z va V belgilarining ommaviy namoyishi 2022-yil bahorida Latviya hukumati tomonidan taqiqlangan edi, xuddi shunday chora Germaniyada ham mavjud. Ukrainada Rossiya armiyasining ramzlariga ham taqiq joriy qilindi. “Ukrainskaya Pravda” ta’kidlaganidek, bu belgilar faqat muzey ko‘rgazmalarida, darsliklarda va ilmiy ishlarda ishlatilishi mumkin.
Izoh (0)