Qozog‘iston moliya vaziri Madi Takiyevdan amerikalik xonanda Jennifer Lopesning Ostona va Olmaotada bo‘lib o‘tgan konsertlaridan byudjetga qancha mablag‘ tushgani so‘raldi. Bu haqda “Tengrinews” xabar berdi.
Vazirning so‘zlariga ko‘ra, Qozog‘istonda bo‘lib o‘tgan konsertga jami 12 mingga yaqin turist kelgan.
Umuman olganda, konsert foydali bo‘ldi. Birinchidan, Jey Lo yolg‘iz kelmaydi, u bilan birga qo‘shni davlatlardan sayyohlar ham tashrif buyurdi. Ostonadagi konsertga 5 mingga yaqin, Olmotadagi konsertga esa 7 mingga yaqin sayyoh keldi. Ularning barchasi mehmonxonalarda joylashdi, restoranlarga tashrif buyurdi, shahar bo‘ylab sayr qildi. Bizning hisob-kitoblarimizga ko‘ra, har bir sayyoh kamida ming dollar sarflaydi, dedi Takiyev.
U jahon yulduzining kelishi iqtisodiyotga ijobiy ta’sir ko‘rsatganini qayd etdi.
Soliqlar masalasida hali hisob-kitob qilganimiz yo‘q. Soliq to‘lash muddati hali kelmadi, ammo biz kuzatyapmiz: qaysi mehmonxonalarda va qanchaga narxlar oshgani, restoranlarda narxlar qanchalik ko‘tarilgani, kassalardagi aylanma qancha bo‘lgani. Deklaratsiyalar topshirilganda bularni aniq ko‘ramiz, deya ta’kidladi vazir.
Jahon yulduzining konsertidan tushgan daromad haqida Qozog‘iston milliy iqtisodiyot vaziri o‘rinbosari Serik Jumangarin ham o‘z fikrini bildirdi.
Men konsert tashkilotchisi bilan gaplashdim, u 400 million tenge (salkam 743 ming dollar) daromad olish rejalashtirilayotganini aytdi. Ammo soliq deklaratsiyasini topshirish muddati 25-noyabrgacha, shundan so‘ng 25 kun ichida soliqni to‘lash kerak. Reja — 400 million tenge, dedi u.
Jennifer Lopesning Toshkentdagi konsertidan qancha foyda bo‘ldi?
Amerikalik xonanda 7-avgust kuni Toshkentdagi “Milliy” stadionda ham konsert berdi. Madaniyat va sanʼatni rivojlantirish jamg‘armasi “Gazeta.uz”ga ma’lum qilishicha, konsertdan 42,5 mlrd so‘mdan ($3,3 mln) ortiq soliq tushum tushgan. Tadbir uchun 15 mingdan ortiq turist tashrif buyurgan. Mehmonxonalarning bandlik darajasi o‘tgan yilning shu davriga nisbatan 25,7 foizga oshgan. Toshkentga Lopes bilan birga 90 dan ortiq kishidan iborat jamoa kelgan.
Izoh (0)