Checheniston rahbari Ramzan Qodirovning kenja o‘g‘li, 17 yoshli Adam Qodirov Checheniston IIV kuratori etib tayinlandi. Bu haqda “RBK” xabar berdi.

Tayinlov otasi Ramzan Qodirovning buyrug‘i bilan amalga oshirilgani aytilmoqda. Kichik Qodirov yangi lavozimga kirishgach, idorada amalga oshirilgan o‘zgarishlar haqida ma’lum qilib, bir nechta ofitserlarni mukofotlagan. 2025-yil 27-mart kuni Adam Qodirov Rossiya gvardiyasining “Jangovar xizmatlari uchun” medali bilan taqdirlangan edi.
Ramzan Qodirovning o‘g‘li 17 yoshda. 2024-yil dekabr oyi boshida unga Kavkaz urushining faol ishtirokchisi, chechen qo‘mondoni, noib Imamat Baysungur Benoyevskiy ordeni abadiy saqlash uchun topshirilgan. O‘sha yilning avgust oyi oxirida unga respublikaning oliy mukofoti — Ahmad Qodirov ordeni berildi.
Adam Qodirov 2023-yil oktyabr oyida Grozniy tergov izolyatorida Qur’onni yoqib yuborganlikda ayblangan Nikita Juravelni kaltaklagani uchun Checheniston Qahramoni unvoniga sazovor bo‘lgan. “Jinoiy hodisa mavjud emasligi” sababli bu borada jinoyat ishi qo‘zg‘atilmagan.
Qodirovning o‘g‘lida yana bir qancha mukofotlar bor. U Checheniston rahbari xavfsizlik xizmatida bo‘lim boshlig‘i hisoblanadi. Shuningdek, Vladimir Putin nomidagi Rossiya maxsus kuchlari universiteti va Shayx Mansur nomidagi batalyonga kurator etib tayinlangan edi.
2025-yil fevral oyida esa Adam Qodirov Arab arbitraj sudi a’zosi bo‘ldi. Tegishli guvohnoma Qodirovning o‘g‘liga Checheniston vakillari delegatsiyasi tarkibida Misrga tashrifi chog‘ida topshirilgan.
Arab davlatlari ligasining muhim iqtisodiy organlaridan biri — Arab iqtisodiy birligi kengashi bo‘lib, u 1964-yilda tashkil etilgan. Uning bosh qarorgohi Qohirada joylashgan. 2021-yilda kengash huzurida ham yuridik shaxslar o‘rtasidagi, ham davlatlararo darajada tijoriy, iqtisodiy, investitsiyaviy nizolarni hal qiluvchi instansiya — Arab arbitraj sudi tashkil etildi.
Qarindoshlarimning har qanday muassasa va har qanday lavozimdagi talabi o‘n barobar ko‘p, chunki ular menga qaramay ishlashini isbotlashi kerak. Kimga ishonsam, o‘shani tayinlayman, degan edi Qodirov bu borada.
Izoh (0)