Mazkur poyezdlar A nuqtadan B nuqtaga borish uchungina emas. Ular sizga go‘zal manzaralar-u hashamatli sayohatni va’da qiladi.
Suite Shiki-Shima
Yaponiya temir yo‘llarining “Suite Shiki-Shima” poyezdiga chipta olib, go‘zal manzalarni tomosha qilishga yo‘llanma sotib olgan bo‘lasiz.
Eng qimmat chipta 10 ming dollarga tushadi. Bu pulga hashamatli hayot kafolatlangan.
Loyiha bilan Ferrari Enzo va Maserati Quattroporte ustida ishlagan Ken Kioyuki Okuyamaning shaxsan o‘zi shug‘ullangan. Ovqatlarni Mishlen yulduzi sohibi Kotsuhiro Nakamuro tayyorlaydi.
G8 sammitida Kotsuxiro Nakamuro davlat rahbariga shaxsan o‘zi ovqat pishirgan. Eng muhimi, yo‘l-yo‘lakay 12 ta shaharga kirasiz. Poyezd Tokiodan Xokaydo oroliga boradi.
Har bir nuqtada yo‘lovchilar ekskursiyalar, spa, issiq buloqlar, eng yaxshi restoranlarga tashrif buyurishi mumkin.
Sakuraning birorta guli ko‘rinmay qolmasligi uchun ishlab chiquvchilar alohida kuzatuv vagonini ham qo‘shishgan.
Afrika iftixori
Rovos Rail’ni haqli ravishda sayyoramizdagi eng hashamatli poyezdlardan biri deb atash mumkin.
Pride of Africa (“Afrika iftixori”)ning eng uzoq marshruti — Keyptaundan Tanzaniyadagi Dar as-Salomgacha bo‘lgan ikki haftalik yo‘l.
Yo‘lovchilar olmosli Kimberli shahriga tashrif buyurishadi, qudratli Zambezining jo‘shqin suvlarini tomosha qilib, o‘n mingdan ortiq jonivorlar yashaydigan Madikve qo‘riqxonasida ikki kecha tunashadi.
Darvoqe, poyezdda chekish, kuzatish hamda restoran uchun ikkita vagon bor. Deraza ortida tuyaqushlar, antilopalar, qo‘toslar yugurib yuradi.
Taomlar bilan albatta Afrika sharoblari ham tortiladi. Ushbu sayohatning narxi taxminan 10 ming dollar turadi.
Qirollik yo‘li
Agar millionerlar hayoti joningizga tegib, ko‘proq narsa xohlasangiz — Hindistonga keling. Bu yerda o‘zingizni maharoja kabi his qilishingiz mumkin. Maharajas Express bu — qirollik saroyining nusxasi, faqat g‘ildirakli.
Mazkur poyezdda 14 ta vagon bo‘lib, ularning har biri qimmatbaho toshlar nomi bilan atalgan: brilliant, zangori sapfir, marjon, feruza va boshqalar. Har bir vagonda eshik og‘asi ishlaydi. Uning vazifasi — aziz mehmonlarning dam olishi uchun maksimal darajada qulaylik yaratish.
Chipta sotib olishingiz bilan fillarda sayr qilish, Toj Mahalni ziyorat qilish, Udaypur shahridagi ko‘l suvlarida qayiqda suzish va yovvoyi tabiatdagi yo‘lbarslarni ko‘rish imkoniyatiga ega bo‘lasiz.
Poyezdda gimnastika zali, sauna, spa-markaz, massaj xonasi, ikkita restoran bor. Ko‘plab yo‘lovchilar ishbilarmon odamlar ekanligi hisobga olinib, Maharajas Express’da uchrashuvlar o‘tkazish uchun biznes markaz ham yaratilgan.
Yo‘lovchilarga davomiyligi 3 kundan 8 kungacha bo‘lgan 5 ta tur taklif etiladi. Prezident xonasida sayohat qilishni xohlasangiz, bu sizga 24 ming dollarga tushadi.
“Burgut”da butun mamlakat bo‘ylab
“Oltin burgut” poyezdi — Rossiya go‘zalligini butun rang-barangligini ko‘rish imkoniyatini beradi. Eng mashhur yo‘nalishlardan biri: Moskva—Vladivostok. Sayohat butun mamlakat bo‘ylab ikki hafta davom etadi.
Eng hashamatli xonada sayohat qilish bitta yo‘lovchiga 40 ming yevrodan ortiqqa tushadi.
“Oltin burgut”da asosan chet elliklar sayohat qilishini taxmin qilish qiyin emas. Ular 15 kun ichida Moskvadagi Arbat bo‘ylab sayr qilishlari, Yekaterinburgda Yevropa va Osiyo chegarasida bo‘lishlari, Irkutskda matryoshka chizishni o‘rganishlari va dunyodagi eng chuqur ko‘l — Baykalga sho‘ng‘ishlari mumkin bo‘ladi.
Poyezdda ikkita vagon-restoran, vagon-bar, spa-muolajalar, sport bilan shug‘ullanish imkoniyati bor. Yuqori sifatli taomlar va har bir xonada barcha qulayliklar ta’minlangan.
Adabiy poyezd
Poyezd 1883-yilda Parij va Istanbul o‘rtasida qatnay boshlagan. Bu G‘arb va Sharqni bog‘laydigan birinchi temir yo‘l marshruti edi.
90 yildan keyin ekspress foyda keltieish u yoqda tursin, byudjetga zarar keltira boshlaydi. Ammo millioner Jeyms Shervud 35 ta original vagonni sotib olib, ularni qayta tiklaydi.
Hozir poyezd butun Yevropa bo‘ylab qatnaydi. Poyezddagi taomlar eng mohir fransuz oshpazlari tomonidan tayyorlanadi.
Butun poyezd deyarli muzey. Masalan, 3647-vagondagi barda Vladimir Nabokov “Lolita”ni yoza boshlagan, Odri Xepbern esa o‘zining birinchi “margarita”sini aynan shu poyezdda ichgan. Bu poyezdda Yelizaveta II, Sharl de Goll, Mata Xari sayohat qilgan. Sayohat narxi yo‘nalish va xonaga qarab 1,5 ming dollardan 20 ming dollargacha turadi.
Izoh (0)