Россия Федерациясининг Санкт-Петербург шаҳрида дайдилик тарихига бағишланган “бомж”лар музейи очилди. Бу ҳақда “РИА Новости” хабар бермоқда.
Музейга фақат экскурсия гуруҳлари таркибида ташриф буюриш мумкин. Чипталар сотувидан олинган маблағлар ходимларнинг иш ҳақини тўлашга ва оғир вазиятга тушиб қолган одамларни қўллаб-қувватлашга йўналтирилади.
Музей экспозициясида қадимги даврдан ХХ аср охиригача бўлган турли тарихий даврларни қамраб олган уйсиз одамларнинг ҳаёт тарзи намойиш этилган. Музейда бешта персонажни учратиш мумкин: Х асрда Русни христианлаштириш давридан сўнг Қуддусга саёҳат қилган дарбадар калика; Пётр I давридаги қочқин сибирлик маҳбус; ХIX асрдаги тунги бошпана яшовчиси, шунингдек, СССР ва 1990 йиллардаги уйсизлар.
Музей асосчилари таъкидлашича, залларда асосий экспонатлардан ташқари, моддий ва маънавий қадриятларни ўзида мужассам этган буюмлар намойиш этилмоқда. Бир йилдан ортиқ давом этган экспонатларни тўплаш турли йўллар билан амалга оширилган. Экспозиция доимий равишда ўзгариб, ривожланиб боради.
Шунингдек, музейда кино кўрсатувлари, фотосуратлар кўргазмаси ва мавзули маърузалар каби маърифий тадбирлар учун майдон вазифасини ўтайди. Унда турли соҳа мутахассислари уйсизлик муаммосини ёритадилар. Бундан ташқари, ҳикоялар ўқиш ва уйсизлик қийинчиликларини енгиб, янги ҳаёт бошлаган инсонлар билан учрашувлар ўтказиш режалаштирилган.
“Ҳозирча чипта нархи киши бошига 650 рублни ташкил этади. Бу суммага экскурсия хизмати ҳам киритилган. Бу маълум маънода хоналаримиз тўлиқ жиҳозланмагани, масалан, ҳали тўлиқ гардероб йўқлиги учун чегирмадир. Икки ҳафтадан сўнг, ҳамма нарса тайёр бўлгач, нархни 850 рублгача оширишни режалаштирмоқдамиз”, деди музей ташкилотчиси Андрей Бородин.
Бородиннинг айтишича, ташриф буюрувчилар учун чегирмалар тизими ўрнатилмаган, бироқ уруш фахрийларидан бирортаси экспозицияни кўрмоқчи бўлса, бепул кириши мумкин.
Изоҳ (0)