Armaniston Tashqi ishlar vazirligi Kollektiv xavfsizlik shartnomasi tashkilotining byudjetiga yillik badallarni to‘lash bo‘yicha tegishli hujjatni imzolashdan bosh tortdi. Bu haqda Sputnik Armaniston xabar bermoqda.
Armaniston tomoni KXSHT kotibiyatini “KXSHTning 2024-yilgi byudjeti to‘g‘risida”gi qarorni imzolashdan va shunga muvofiq tashkilot faoliyatini moliyalashtirishda ishtirok etishdan o‘zini tiyishi haqida rasman xabardor qildi, deyiladi TIV xabarida.
Shuningdek, idoraning ta’kidlashicha, KXSHTning ichki tartib-qoidalariga muvofiq, yillik byudjet to‘g‘risidagi ma’lumotlar jamoatchilikka tarqatilmaydi.
Rossiya tashqi ishlar vaziri o‘rinbosari Aleksandr Pankin Armaniston 2025-yil oxirigacha badalni to‘lamasa, KXSHTga a’zo davlatlar vaziyatning turli ssenariylarini ko‘rib chiqishi mumkinligini aytgandi.
O‘tgan yilning may oyida Armaniston tashkilotning 2024-yilgi byudjetini moliyalashtirishdan bosh tortishini rasman e’lon qilgan edi. Shunga qaramay, KXSHT vakillarining ma’lum qilishicha, 2025-yil uchun badal summasi baribir hisoblanadi.
Armaniston bosh vaziri Nikol Pashinyan avvalroq mamlakatning KXSHT faoliyatidagi ishtiroki to‘xtatilishini bir necha bor ta’kidlagan edi.
Sentyabr oyida u tashkilotni Armaniston uchun “xavfsizlikka tahdid” deb ta’riflagan va u bilan munosabatlarda ortga qaytmaslik nuqtasi allaqachon o‘tilganini aytgan. Rossiya prezidenti matbuot kotibi Dmitriy Peskov Armaniston bosh vazirining pozitsiyasiga norozilik bildirib, KXSHT a’zo mamlakatlar suverenitetini himoya qilish uchun yaratilganini va hech qanday tahdidga ega emasligini ta’kidlagan.
Izoh (0)