AQSHning saylangan prezidenti Donald Tramp Qo‘shma Shtatlarning Suriyadagi vaziyatga hech qanday aloqasi bo‘lmasligi kerakligini ta’kidladi.
U Suriya ularga “do‘st emas”ligi sababli mojaroga aralashmaslikka chaqirdi.
Suriyada tartibsizlik avj olgan, u bizning do‘stimiz emas, shuning uchun Qo‘shma Shtatlarning ushbu mojaroga hech qanday aloqasi bo‘lmasligi kerak. Bu bizning urushimiz emas. Ular o‘z qoidalari bo‘yicha o‘ynasin. Aralashmang!” deb yozdi Tramp Truth Social ijtimoiy tarmog‘ida.
Siyosatchining so‘zlariga ko‘ra, Suriyadagi dastlabki mojaroda AQSHning sobiq prezidenti Barak Obama aybdor, buning natijasida “haqiqiy do‘zax boshlandi, unga Rossiya aralashdi”. Trampning fikricha, Rossiya Ukrainadagi urush bilan band bo‘lgani sababli “ko‘p yillar davomida himoya qilib kelgan Suriya orqali bu yurishni to‘xtata olmayapti”.
Endi ruslar, xuddi Asadning o‘zi kabi, quvib chiqarilmoqda va bu ular bilan sodir bo‘lishi mumkin bo‘lgan eng yaxshi ssenariy bo‘lishi mumkin. Rossiya Suriyadan, Obamaning juda ahmoqona ko‘rinishidan tashqari, hech qanday alohida foyda olmadi, deb yozgan Tramp.
Suriyadagi vaziyat
Isyonchilarning Halab provinsiyasi g‘arbiy qismida hukumat kuchlariga qarshi keng ko‘lamli hujumi 27-noyabr kuni boshlandi. Ikki kundan so‘ng ular 2016-yildan beri birinchi marta Halab shahriga kirdi. Hujumga Suriyadagi fuqarolar urushi davrida Asadga qarshi chiqqan “Hay’at Tahrir al-Shom” terrorchilik tashkiloti boshchilik qildi.
30-noyabr kuni Suriya armiyasi Halabdan “qo‘shinlarni vaqtincha olib chiqib ketishi”ni e’lon qildi. Ammo Asad Suriya “do‘stlari va ittifoqchilari yordamida terrorchilarni yo‘q qilishga qodir”ligini ishonch bilan ta’kidlab, terrorizmni yo‘q qilishni “mintaqadagi barqarorlik va xavfsizlik” garovi deb atadi.
Suriya prezidenti Bashar Asad mamlakatdagi vaziyat yuzasidan Isroildan yordam so‘radi. Murojaat Asadning Yevropadagi yordamchilaridan biri orqali Isroil tomoniga yetkazilgan. Ushbu so‘rovga yahudiy davlati tanqidiy javob bergan. Jumladan, Isroil hukumati Suriyadagi vaziyat ularni tashvishga solmasligini aytib, “avvalo Suriyadan eronparast ko‘ngillilarni olib tashlash, so‘ngra yordam so‘rash” kerakligini maslahat bergan.
Izoh (0)