Qozog‘iston prezidenti Qosim-Jo‘mart To‘qayev Ukraina atrofidagi vaziyatning keskinlashuvi munosabati bilan asosiy harbiy va fuqarolik obyektlari xavfsizligini ta’minlash maqsadida bosh vazir, prezident administratsiyasi rahbari, barcha kuch ishlatish idoralari rahbarlari va hokimlarga shoshilinch choralar ko‘rishni topshirdi. Bu haqda 21-noyabr kuni kechqurun To‘qayevning maslahatchisi — matbuot kotibi Berik Uali ma’lum qildi.
“Qozog‘iston Parlamenti palatalarining raislari qabul qilinayotgan choralar to‘g‘risida xabardor etildi. Mamlakatdagi vaziyat prezidentning shaxsiy nazorati ostida”, dedi Berik Uali.
U davlat uchun asosiy strategik maqsad — barqarorlik, osoyishtalik, qonuniylik va tartibni saqlash ekanini bildirdi.
“Qozog‘iston ikki slavyan xalqi o‘rtasidagi harbiy harakatlarni muzokaralar yo‘li bilan to‘xtatish masalasini bir necha bor qo‘llab-quvvatlagan”, dedi To‘qayevning maslahatchisi.
Ukrainadagi so‘nggi vaziyat
19-noyabr kuni Ukraina armiyasi Rossiya hududiga AQSHning uzoq masofaga uchuvchi ATACMS raketalari bilan zarba berdi. Hujum Bryansk viloyati Karachev shahridagi harbiy obyektga qaratilgan. ATACMSning maksimal uchish masofasi 300 kilometrni tashkil qiladi.
AQSH prezidenti Jo Bayden 17-noyabr kuni mazkur raketani Rossiya ichkarisiga qo‘llashga ruxsat berdi. Ukraina uzoq vaqtdan beri G‘arb qurollari bilan Rossiya hududiga zarba berishga ruxsat etilishini kutayotgandi. Kreml rahbari Vladimir Putin esa bunday qurollarni Rossiyaga qarshi qo‘llash urushga kirishishni anglatishidan ogohlantirgan.
21-noyabr kuni Rossiya ilk bor Ukrainaning Dnepr shahri bo‘ylab qit’alararo ballistik raketa uchirdi. Hujum Astraxan viloyatidagi poligondan amalga oshirilgan. Qit’alararo ballistik raketa besh ming kilometr masofani bosib o‘tishi mumkin, ammo ularning ba’zilari to‘qqiz ming kilometrdan ortiq masofaga mo‘ljallangan.
Dastlab raketa hujumi haqida Ukraina Qurolli kuchlari xabar bergan. Keyinchalik ma’lumotni Rossiya prezidenti tasdiqlagan. Putinga ko‘ra, Rossiya Amerika va Britaniyada ishlab chiqarilgan qurollarning mamlakat hududiga hujumlariga javoban “Oreshnik” raketasidan foydalangan.
Izoh (0)