Finlyandiyada 75 nafar ayol Rossiya bilan ehtimoliy urushga tayyorgarlik ko‘rishni boshladi. Bu haqda The Guardian xabar berdi.
Ma’lum qilinishicha, ayollarga birinchi tibbiy yordam ko‘rsatish, gulxan yoqish, ochiq havoda ovqat pishirish va chodirlar o‘rnatish o‘rgatilmoqda. Ular kiberxavfsizlik, ruhiy barqarorlik, yovvoyi tabiatda omon qolish ko‘nikmalari bo‘yicha ham bilim olmoqda. Shunday ayollar guruhlaridan biri Finlyandiyaning sharqidagi harbiy bazada ta’lim o‘tamoqda.
Ayollarni favqulodda vaziyatlarga tayyorlovchi kurs Nasta deb nomlanadi, u 1997-yildan beri faoliyat yuritib kelmoqda. U qisman Finlyandiya Mudofaa vazirligi tomonidan moliyalashtiriladi va Milliy mudofaani o‘qitish assotsiatsiyasidan katta yordam oladi. Nasta taxminan 100 ming a’zoga ega. Rossiyaning Ukrainaga keng ko‘lamli hujumi boshlangan 2022-yil 24-fevralda kursga qiziqish misli ko‘rilmagan darajada oshgan.
So‘nggi ma’lumotlarga ko‘ra, Finlyandiya urush holatida aholi foydalanishiga mo‘ljallangan qo‘llanma ishlab chiqmoqda. U omma foydalanishi uchun internetda ham mavjud bo‘ladi. Finlyandiya hukumati, shuningdek, 2026-yil oxirigacha Rossiya bilan chegarada 200 kilometr uzunlikdagi to‘siqlar qurishni rejalashtirgan.
Ikki qo‘shni davlat o‘rtasida rasmiy harbiy hamkorlik yo‘q bo‘lsa-da, Finlyandiya razvedka xizmatlari Rossiyani Finlyandiya milliy xavfsizligiga “eng katta tahdid” deb ta’riflaydi va gibrid urush ketayotganiga shubha qilmaydi.
Finlyandiya Ukrainani Rossiya bosqiniga qarshi kurashida faol qo‘llab-quvvatlab, harbiy va gumanitar yordam ko‘rsatib kelmoqda.
Izoh (0)