Avvalroq Toshkent viloyati Piskent tumanidagi manzil-koloniyada mahkum qiynoqqa solinib, so‘ng asossiz intizomiy bo‘linmaga joylashtirilgani aniqlangani haqida xabar berilgandi. Holat yuzasidan Bosh prokuratura izoh berdi.
Aniqlanishicha, 36 yoshli mahkum T.I.ga sudning tegishli hukmiga ko‘ra, ozodlikdan mahrum qilish jazosi tayinlanib, u manzil-koloniyaga 2024-yilning 1-dekabr kuni jazo muddatini o‘tash uchun keltirilgan.
O‘rganishda, T.I. koloniyadagi ichki tartib qoidalarini buzgani sababli koloniya boshlig‘ining 28-fevraldagi qaroriga asosan o‘n sutka intizomiy bo‘linmaga kiritish tariqasidagi intizomiy jazoga tortilgan.
Qaror Toshkent maxsus prokuratura tomonidan o‘rganilib, 4-martdagi intizomiy jazoni bekor qilish bo‘yicha protest keltirilgan.
5-mart kuni mahkum T.I. sog‘lig‘idan shikoyat qilib, Piskent tumani tez tibbiy yordamga murojaat qilgan va 15-mart kuniga qadar Terapiya bo‘limida “o‘tkir bronxit va surunkali tonzilit kasalligi” tashxisi bilan davolangan.
Piskent tumani tibbiyot birlashmasining 1798/31-sonli tibbiy bayonnomasidan ko‘chirmada mahkum T.I.da tan jarohatlari borligi aniqlanmagan.
Prokuratura tomonidan mahkum T.I. koloniya xodimlari tomonidan qiynoqqa solingani holati o‘rganilib, voqea joyi ko‘zdan kechirilgan hamda mahkum sog‘lig‘idan shikoyati yo‘qligi sababli sud-tibbiy ekspertizasidan o‘tishdan bosh tortgan.
Koloniya xodimlarining xatti-harakatlariga huquqiy baho berish uchun xizmat tekshiruvi tayinlangan.
Toshkent maxsus prokuratura tomonidan tergovga qadar tekshiruv harakatlari o‘tkazilmoqda.
Hibsda vafot etayotganlar ishi
18-mart kuni bo‘lib o‘tgan Senat yalpi majlisida Inson huquqlari bo‘yicha vakil (ombudsman)ning 2024-yildagi faoliyati muhokama qilindi.
Muhokamalar jarayonida senator Husan Ermatov prezidentning tegishli qaroriga ko‘ra, so‘roq jarayonini stenogramma qilish, videokuzatuv, shuningdek, tergov harakatlarini audio va video qayd etish tizimlari bilan jihozlangan xonalarni tashkil etish bo‘yicha ishlar qay darajada ekani yuzasidan IIV masʼullariga savol berdi. Savolga IIV huzuridagi Tergov departamenti boshqarma boshlig‘i Sherzod Shermatov javob berdi. Uning aytishicha, bugungi kunda departament va uning hududiy bo‘limlarida tergov harakatlarini audio va video qayd etish tizimlari bilan jihozlangan 57 ta maxsus xonalar tashkil etilgan.
Fevral oyida Surxondaryoda so‘roqqa olib ketilgan fermer vafot etgan, IIV Jazoni ijro etish departamentining Olmaliqdagi 14-sonli koloniyasidan 21 yashar mahkum — Muhammadqodir Po‘latovning jasadi chiqqan edi.
Maʼlumot uchun, qiynoq oqibatida kelib chiqqan o‘lim holatlari uchun javobgarlik kuchaytirilmoqda. Unga ko‘ra, Jinoyat kodeksiga kiritilayotgan o‘zgartirish va qo‘shimchalarga muvofiq 235-modda 3 va 4-qism bilan to‘ldirilyapti:
- ushbu moddaning birinchi yoki ikkinchi qismida nazarda tutilgan harakatlar badanga og‘ir shikast yetkazilishiga sabab bo‘lsa, muayyan huquqdan mahrum etib, 8 yilgacha ozodlikdan mahrum qilish bilan jazolanadi;
- ushbu moddaning birinchi yoki ikkinchi qismida nazarda tutilgan harakatlar jabrlanuvchining o‘limiga yoki boshqa og‘ir oqibatlarga sabab bo‘lsa, muayyan huquqdan mahrum etib, 8 yildan 10 yilgacha ozodlikdan mahrum qilish bilan jazolanadi.
Izoh (0)