Аввалроқ Тошкент вилояти Пискент туманидаги манзил-колонияда маҳкум қийноққа солиниб, сўнг асоссиз интизомий бўлинмага жойлаштирилгани аниқлангани ҳақида хабар берилганди. Ҳолат юзасидан Бош прокуратура изоҳ берди.
Аниқланишича, 36 ёшли маҳкум Т.И.га суднинг тегишли ҳукмига кўра, озодликдан маҳрум қилиш жазоси тайинланиб, у манзил-колонияга 2024 йилнинг 1 декабрь куни жазо муддатини ўташ учун келтирилган.
Ўрганишда, Т.И. колониядаги ички тартиб қоидаларини бузгани сабабли колония бошлиғининг 28 февралдаги қарорига асосан ўн сутка интизомий бўлинмага киритиш тариқасидаги интизомий жазога тортилган.
Қарор Тошкент махсус прокуратура томонидан ўрганилиб, 4 мартдаги интизомий жазони бекор қилиш бўйича протест келтирилган.
5 март куни маҳкум Т.И. соғлиғидан шикоят қилиб, Пискент тумани тез тиббий ёрдамга мурожаат қилган ва 15 март кунига қадар Терапия бўлимида “ўткир бронхит ва сурункали тонзилит касаллиги” ташхиси билан даволанган.
Пискент тумани тиббиёт бирлашмасининг 1798/31-сонли тиббий баённомасидан кўчирмада маҳкум Т.И.да тан жароҳатлари борлиги аниқланмаган.
Прокуратура томонидан маҳкум Т.И. колония ходимлари томонидан қийноққа солингани ҳолати ўрганилиб, воқеа жойи кўздан кечирилган ҳамда маҳкум соғлиғидан шикояти йўқлиги сабабли суд-тиббий экспертизасидан ўтишдан бош тортган.
Колония ходимларининг хатти-ҳаракатларига ҳуқуқий баҳо бериш учун хизмат текшируви тайинланган.
Тошкент махсус прокуратура томонидан терговга қадар текширув ҳаракатлари ўтказилмоқда.
Ҳибсда вафот этаётганлар иши
18 март куни бўлиб ўтган Сенат ялпи мажлисида Инсон ҳуқуқлари бўйича вакил (омбудсман)нинг 2024 йилдаги фаолияти муҳокама қилинди.
Муҳокамалар жараёнида сенатор Ҳусан Эрматов президентнинг тегишли қарорига кўра, сўроқ жараёнини стенограмма қилиш, видеокузатув, шунингдек, тергов ҳаракатларини аудио ва видео қайд этиш тизимлари билан жиҳозланган хоналарни ташкил этиш бўйича ишлар қай даражада экани юзасидан ИИВ масъулларига савол берди. Саволга ИИВ ҳузуридаги Тергов департаменти бошқарма бошлиғи Шерзод Шерматов жавоб берди. Унинг айтишича, бугунги кунда департамент ва унинг ҳудудий бўлимларида тергов ҳаракатларини аудио ва видео қайд этиш тизимлари билан жиҳозланган 57 та махсус хоналар ташкил этилган.
Февраль ойида Сурхондарёда сўроққа олиб кетилган фермер вафот этган, ИИВ Жазони ижро этиш департаментининг Олмалиқдаги 14-сонли колониясидан 21 яшар маҳкум — Муҳаммадқодир Пўлатовнинг жасади чиққан эди.
Маълумот учун, қийноқ оқибатида келиб чиққан ўлим ҳолатлари учун жавобгарлик кучайтирилмоқда. Унга кўра, Жиноят кодексига киритилаётган ўзгартириш ва қўшимчаларга мувофиқ 235-модда 3 ва 4-қисм билан тўлдириляпти:
- ушбу модданинг биринчи ёки иккинчи қисмида назарда тутилган ҳаракатлар баданга оғир шикаст етказилишига сабаб бўлса, муайян ҳуқуқдан маҳрум этиб, 8 йилгача озодликдан маҳрум қилиш билан жазоланади;
- ушбу модданинг биринчи ёки иккинчи қисмида назарда тутилган ҳаракатлар жабрланувчининг ўлимига ёки бошқа оғир оқибатларга сабаб бўлса, муайян ҳуқуқдан маҳрум этиб, 8 йилдан 10 йилгача озодликдан маҳрум қилиш билан жазоланади.
Изоҳ (0)