Toshkent viloyatining Bo‘stonliq tumanida joylashgan 7-sonli jazoni ijro etish koloniyasida jazo muddatini o‘tayotgan mahkum vafot etgani haqida xabar berilgan edi. Inson huquqlari bo‘yicha vakil — ombudsman holat yuzasidan ma’lumot berdi.
Unga ko‘ra, 16-fevral kuni Tovoqsoydagi 7-son jazoni ijro etish koloniyasida jazo muddatini o‘tayotgan mahkum M.T.ning vafot etgani holati ombudsman nazoratiga olingan.
11-fevral kuni taxminan soat 16:10 da mahkum M.T. koloniya hududidagi eski oshxona binosida obodonlashtirish ishlariga jalb etilgan. Devorni buzish jarayonida ehtiyotsizlik sababli uning bir qismi mahkum ustiga qulagan, natijada og‘ir tan jarohati olgan.
Ushbu holat ombudsman devoni xodimlari va Toshkent viloyatidagi mintaqaviy vakili tomonidan joyiga chiqib o‘rganildi. Shuningdek, ombudsmanning Qoraqalpog‘iston Respublikasidagi mintaqaviy vakili marhumning oila a’zolari bilan uchrashib, ularga ta’ziya bildirdi.
Qayd etilishicha, marhumning otasi Bo‘stonliq tuman tibbiyot birlashmasida 5 kun davomida o‘g‘lining yonida bo‘lgan.
Bundan avval IIV Jazoni ijro etish departamentining Olmaliqdagi 14-sonli koloniyasida jazoni o‘tayotgan 21 yashar mahkum vafot etgani haqida xabar berilgan edi. Ushbu holat yuzasidan ham Toshkent maxsus prokuraturasi tomonidan tergovga qadar tekshiruv harakatlari olib borilmoqda.
Izoh (0)