Surxondaryolik bloger Otabek Sattoriy tez orada ozodlikka chiqishi mumkin. Bu haqda O‘zbekiston inson huquqlari “Ezgulik” jamiyati faoli Abdurahmon Tashanov o‘zining Facebook’dagi sahifasida ma’lum qildi.
Jamiyat axborot xizmatining bildirishicha, Ichki ishlar vazirligining Jazoni ijro etish departamenti Abdurahmon Tashanovning ikki mahkum — Dauletmurat Tojimuratov hamda bloger Otabek Sattoriy bilan uchrashuviga imkoniyat yaratib bergan.
Jamiyatimiz faoli Abdurahmon Tashanov shu yilning 12-yanvar kuni Navoiyda Dauletmurat Tojimuratov, 13-yanvarda esa Qarshida bloger Otabek Sattoriy bilan uchrashdi. Tashanovga ko‘ra, ikki mahkumning ham sog‘lig‘i bilan bog‘liq holatdan e’tirozi yo‘q. Ular o‘zlariga nisbatan chiqarilgan sud hukmlaridan norozi, kelgusida o‘zlarining haq-huquqlari uchun kurashni davom ettirishmoqchi, — deyiladi jamiyat axborot xizmati xabarida.
Abdurahmon Tashanovning Qarshidagi manzil kaloniya boshlig‘iga tayanib yozishicha, bloger Otabek Sattoriy 2024-yilning aprel oyi oxiri yoki may oyi boshida ozodlikka chiqadi.
Qarshidagi manzil koloniyada bloger Otabek Sattoriy bilan uchrashuv juda yaxshi o‘tdi. Otabek avvalo o‘zini qo‘llab-quvvatlagan barchaga minnatdorchilik bildirdi. Koloniya boshlig‘ining ta’kidicha, aprel oxiri, mayning boshlarida u ozodlikka chiqadi. Tikuv sexida ishlamoqda, — deydi u.
Mahkum Otabek Sattoriy “Qamoqdagi rasmim internetga chiqishini istamayman”, deya suratga shunchaki estalik uchun tushishini bildirgan.
Otabekning ta’kidicha, o‘ziga chiqarilgan sud hukmi bo‘yicha qayta shikoyat qilish niyati yo‘q. Tinchgina axborot texnologiyalari sohasida ishlamoqchi. O‘zbekiston Respublikasi prezidenti Shavkat Mirziyoyevni yuksak salohiyatli lider, deb biladi va unga xizmat qilishdan o‘zidan faxr tuyadi. Tashanov esa uni jazo muddati bitgach, o‘zini oqlashga urinishga chaqirgan, — deyiladi jamiyat axborot xizmati tarqatgan ma’lumotda.
Jinoyat ishlari bo‘yicha Muzrabot tuman sudining 2021-yil 10-maydagi hukmiga ko‘ra, Otabek Sattoriy Jinoyat kodeksining 139-moddasi (tuhmat) 3-qismi “a”, “g” bandlari va 165-moddasi (tovlamachilik) 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi (yengilroq jazo tayinlash) qo‘llanib, 59-moddasi (bir necha jinoyat sodir etganlik uchun jazo tayinlash) va 61-moddasi (jazolarni qo‘shishning hisoblash qoidalari)ga asosan tayinlangan jazolarni qisman qo‘shish yo‘li bilan uzil-kesil 6 yil 6 oy muddatga ozodlikdan mahrum qilish jazosi tayinlangan. 4-may kuni bo‘lib o‘tgan sud majlisida prokuror unga 11 yil qamoq jazosi tayinlanishini so‘ragandi.
Uning advokati esa apellyatsiya shikoyatini berishini ma’lum qilgandi. Advokatning apellyatsiya ishini Surxondaryo viloyatidan boshqa viloyatga o‘tkazish bo‘yicha iltimosnomasiga asosan apellyatsiya shikoyati Samarqand viloyat sudi jinoyat ishlari bo‘yicha sudlov hay’atida ko‘rildi.
Sattoriy ishi bo‘yicha apellyatsiya sudi 29-iyun kuni boshlangandi. Sudlanuvchining advokati Umidbek Davlatovning ma’lum qilishicha, Bahodir Aliqulov raisligidagi sudyalar hay’ati o‘z qarori bilan bloger bo‘yicha hukmini o‘zgartirmagan. Ammo sudya blogerga Termizda sotib olgan ikki xonadonini qaytarib berish bo‘yicha hukm chiqargan.
Jinoyat ishlari bo‘yicha Samarqand viloyat sudi tomonidan 6,5 yillik qamoq jazosiga hukm qilingan bloger Otabek Sattoriyning ishi to‘g‘risida hukm chiqarilgan. Unga ko‘ra, Sattoriyga nisbatan tayinlangan 6 yil 6 oyga ozodlikdan mahrum qilish jazosi o‘z kuchida qoldirilgan.
Izoh (0)