O‘zbekiston Oliy Majlisining inson huquqlari bo‘yicha vakili qoshidagi Milliy preventiv mexanizmlar bo‘yicha ishchi guruhi Navoiy viloyatidagi jazoni ijro etish muassasalariga safar qildi. Bu haqda O‘zbekiston inson huquqlari “Ezgulik” jamiyati matbuot xizmati ma’lum qildi.
Ishchi guruh muassasalarning holati va u yerdagi jazo o‘tayotgan shaxslar holidan xabar oldi.
Guruh tarkibida ombudsman vakillari, O‘zbekiston inson huquqlari “Ezgulik” jamiyati hamda “Huquqiy tayanch” jamoat birlashmasi vakillari (faqat Zarafshondagi koloniyada – “Ezgulik”) bor edi.
Uchrashuvlarda ishtirok etgan “Ezgulik” jamiyati raisi o‘rinbosari Bekzod Nurmatovga ko‘ra, Zarafshondagi koloniya 2200 kishiga mo‘ljallangan. Hozirda bu yerda 684 nafar mahkum jazo muddatlarini o‘tamoqda, ularning 27 tasi diniy radikal oqimlarga mansublikda ayblangan. Mazkur shahardagi 36-sonli manzil koloniya esa 450 kishini sig‘dira oladi. Bu yerda 272 nafar mahkum bor.
“Navoiy viloyatining Qiziltepa koloniyasi esa o‘z bag‘ridan Xalq artisti Ozodbek Nazarbekov, taniqli jurnalist Xayrulla Hamidovlarni chiqargan, hozirda “xalq orasida mashhur bo‘lgan” piramidachi Ahmadboyni saqlayotgan maskan. Bu koloniya 2200 kishiga mo‘ljallangan, ayni paytda esa 1123 nafar mahbus bor. Ularning 62 nafari diniy ekstremistik oqimlarga mansub”, – deyiladi “Ezgulik” jamiyati matbuot xizmati xabarida.
Qattiq tartibli bu koloniyada taniqli bloger Fozilxo‘ja Orifxo‘jayev bilan uchrashildi. “Qamoqxona sharoitidan shikoyatim yo‘q. Plastik sexida usta bo‘lib ishlayapman. Ammo sud hukmidan noroziman va men qamalishim kerakmasdi” – deydi Fozilxo‘ja.
Koloniya ma’muriyatiga ko‘ra, bu yerga diniy ulamo Abror Muxtor Aliy kelib ma’ruzalar qiladi. Piramidachi Ahmadboy esa “sangorod”da sog‘lig‘ini tiklamoqda.
Navoiy shahridagi 12-sonli qattiq tartibli koloniya esa 1600 kishilik, bu yerda hozircha 1070 mahkum bor. Hozirda bu yerda 1146 nafar mahkum bor. Ularning 60 tasi radikal oqimlar faollari bo‘lgan. Bloger Akmal Sharipov ham shu yerda ekan. Oilasi bilan uzoq muddatli uchrashuvda ekani sababli u bilan uchrashishning imkoni bo‘lmagan. U yaqin 2 oy ichida ozodlikka chiqarilishi mumkin ekan.
Mazkur shahardagi 4-sonli umumiy tartibli koloniyaga esa 1800 kishi sig‘adi. Koloniyada bloger Otabek Sattoriy jazo muddatini o‘tamoqda. U qurilish mollariga naqsh bosuvchi sexda operator. “Ezgulik” faoli bilan uchrashuvda o‘zining nohaq qamalgani, sudlarning adolatsizligini ta’kidlagan bloger oilada yolg‘iz boquvchi ekanini, ozodlikka chiqish uchun kurashayotgani va faqat prezident Mirziyoyevga ishonishini ta’kidlagan.
“Monitoring natijalariga ko‘ra, qamoqxonalarning moddiy texnik bazasini mustahkamlash, ularning osh-ovqati sifatini yaxshilashga urinishmoqda. Shikoyatlarning asosiy qismi sud hukmlarining adolatsizligidan. Eng yomon ko‘rsatkich — mahkumlarning katta qismini yoshlarning tashkil qilishidir.
Qiynoq va noinsoniy muomala turlari bo‘yicha hozircha shikoyat yo‘q. Ammo ayrim mahkumlar bunday holatlarni Buxorodagi koloniyalarda, Qarshidagi jazoni ijro etish muassasalarida eshitilayotgani haqida gapirishgan. ‘Ko‘ramiz, u tomonlarga ham safar rejalashtirish niyatimiz bor’, deydi guruh a’zolari.
‘Ezgulik’ jazoni ijro etish muassasalariga safarni tashkil qilgan O‘zbekiston Respublikasi Oliy Majlisining inson huquqlari vakili idorasiga minnatdorchilik bildiradi”, – deyiladi xabarda.
Ushbu xabar O‘zbekiston inson huquqlari “Ezgulik” jamiyati matbuot xizmatining Facebook’dagi sahifasidan o‘chirib tashlandi. Lekin, jamiyat matbuot xizmati yuqoridagi ma’lumotlarni “Gazeta.uz” nashriga taqdim etgan.
2018-yilning 21-fevral kuni Jinoyat ishlari bo‘yicha Toshkent viloyat sudida Ahmadboy va uning sheriklariga nisbatan hukm e’lon qilinadi.
O‘zbekiston Respublikasi Jinoyat kodeksining 168-moddasi (firibgarlik), 188-moddasi (noqonuniy tadbirkorlik faoliyati), 189-moddasi (savdo yoki xizmat ko‘rsatish qoidalarini buzish), 190-moddasi (faoliyat bilan litsenziyasiz shug‘ullanish), 25-moddasi (jinoyatga tayyorgarlik ko‘rish va jinoyat sodir etishga suiqasd qilish) orqali 211-moddasi (pora berish) va 243-moddasi (jinoiy faoliyatdan olingan daromadlarni legallashtirish)da ko‘zda tutilgan jinoyatlarni sodir etishda ayblangan Ahmadboy, Olmos Qo‘chqorov, Izzatilla Ibrohimov, Murodjon Tursunboyev, Oybek Tursunboyev, Azizjon Turdiyev va Rashid Ismoilovlarga nisbatan sud hukmi o‘qiladi.
Otabek Sattoriyga tayinlangan jazoJinoyat ishlari bo‘yicha Muzrabot tuman sudining 2021-yil 10-maydagi hukmiga ko‘ra, Otabek Sattoriy Jinoyat kodeksining 139-moddasi (tuhmat) 3-qismi “a”, “g” bandlari va 165-moddasi (tovlamachilik) 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi (yengilroq jazo tayinlash) qo‘llanib, 59-moddasi (bir necha jinoyat sodir etganlik uchun jazo tayinlash) va 61-moddasi (jazolarni qo‘shishning hisoblash qoidalari)ga asosan tayinlangan jazolarni qisman qo‘shish yo‘li bilan uzil-kesil 6 yil 6 oy muddatga ozodlikdan mahrum qilish jazosi tayinlangan. 4-may kuni bo‘lib o‘tgan sud majlisida prokuror unga 11 yil qamoq jazosi tayinlanishini so‘ragandi.
Jinoyat ishlari bo‘yicha Samarqand viloyat sudi tomonidan 6,5 yillik qamoq jazosiga hukm qilingan bloger Otabek Sattoriyning ishi to‘g‘risida hukm chiqarilgan. Unga ko‘ra, Sattoriyga nisbatan tayinlangan 6 yil 6 oyga ozodlikdan mahrum qilish jazosi o‘z kuchida qoldirilgan.
Izoh (0)