Surxondaryo viloyatida sodir bo‘lgan jinoyat ishi yuzasidan tergov harakatlari davomida 50 yoshli fermer Toxir Xaitov ma’muriy qamoqqa olingani va keyinroq vafot etgani haqidagi xabarlar ko‘plab muhokamalarga sabab bo‘lmoqda.
Mazkur holat Oliy Majlisning inson huquqlari bo‘yicha vakili (ombudsman) tomonidan nazoratga olinib, holatga doir ma’lumotlar o‘rganilmoqda. Ma’lum qilinishicha, T.Xaitov Jinoyat ishlari bo‘yicha Uzun tuman sudining 2025-yil 24-fevraldagi qaroriga asosan, Ma’muriy javobgarlik to‘g‘risidagi kodeksning 183-moddasi (mayda bezorilik) bo‘yicha aybli deb topilgan va unga 6 sutka ma’muriy qamoq jazosi tayinlangan.
U Termiz shahridagi ma’muriy qamoqxonaga olib borilayotgan vaqtda sog‘lig‘ining yomonlashgani sababli Sariosiyo tuman tibbiy yordam bo‘limiga olib kelingan. Biroq tibbiy xodimlar uning vafot etganini ma’lum qilgan.
Sariosiyo tuman sud-tibbiy ekspertizasi xulosasida marhum yurak ishemik kasalligi, infarkt miokardi, yurak anevrizmi va yurak tamponatsiyasi oqibatida vafot etgani qayd etilgan. Shuningdek, unda piyelonefrit va ateroskleroz asoratlari mavjud bo‘lgan.
Ekspertiza ko‘rigi vaqtida uning badanida biror-bir tan jarohati va uning izlari aniqlanmagani ko‘rsatilgan. Mazkur holat yuzasidan Sariosiyo tuman prokuraturasi tomonidan tergovga qadar tekshiruv harakatlari olib borilmoqda, tekshiruv viloyat prokuraturasi tomonidan nazoratga olingan.
Mazkur holat yuzasidan Bosh prokuraturaga ombudsman tomonidan so‘rov yuborildi. Ombudsman tergovga qadar tekshiruv davomida mazkur holatni har tomonlama, to‘liq va xolisona o‘rganish ta’minlanishini so‘radi.
Marhumning yaqinlari “Kun.uz” saytiga ma’lum qilishicha, marhum qotillik sodir bo‘lgan mahallada yashagan va tumandagi “Abdusalim Barlos” fermer xo‘jaligi rahbari bo‘lgan. IIB xodimlari Uzundagi qotillik ishi yuzasidan mahalladagi barcha erkaklar qatori Tohir Hayitovni ham so‘roq uchun yashab turgan uyidan olib chiqib ketgan.
Uyimizni tintuv qilib, dadamizni olib ketishdi. Ko‘pchilikni 3-4 soatda so‘roq qilib qo‘yib yuborishdi. Lekin dadamni 2 kun ushlab turishdi, tergov bo‘lyapti, deb oldiga kirgizishmadi. Ertasi kuni — 25 fevral ertalabda oldiga borsak, yurak xuruji bo‘lib o‘lib qoldi, deyishdi. Dadam kasal emasdi, yurak bilan bog‘liq hech qanday muammosi yo‘q edi.
Jasadni ekspertiza qilishga bizni kiritishmadi ham, xabarimiz ham bo‘lmadi. Kim bunday qilgan, nega? Hech kim izoh bermayapti. Dadamning qo‘llarida, yuzida va tanasida ko‘kargan izlar bor. Qiynoq qo‘llangan va jinoyatni dadamning bo‘yniga qo‘ymoqchi bo‘lishgan, deb o‘ylayapmiz. Dadam IIB binosida o‘lib qolgan.
Shu kunlarda jinoyatni tergov qilishda respublika ishchi guruhidan kelganlar ham qatnashgan ekan. Dadamning jasadini so‘raganimizda IIB xodimlari boshqa tuman o‘likxonasida, dedi. Lekin u yerda emas ekan. Biz topib beringlar, deganimizdan keyin tuman hokimi kelib, yonimizdagi o‘likxonada ekanini aytdi, deydi marhumning o‘g‘li.
IIB binosiga yurib borib, o‘lik holda qaytganlar
Marhum Muhammadqodir Ichki ishlar vazirligiga qarashli binolardan o‘ligi chiqqanlarning navbatdagisi hisoblanadi. 2020-yil yanvar oyida Qashqadaryo viloyatining Chiroqchi tumanida, iyun oyida esa Andijon viloyatining Andijon shahridagi IIB binolaridan o‘liklar chiqdi. Andijondagi IIB binosida jon bergan Alijon Abdukarimov besh yil avvalgi qimmatbaho tosh mojarosi sabab IIBga tergov qilish uchun olib borilgan bo‘lsa, Chiroqchi tuman IIBdan o‘lik holda chiqqan Yusuf Abdurahmonov mol o‘g‘riligida gumonlanib, so‘roq qilingandi. Har ikkisi ham IIB xodimlarining zo‘ravonligi, so‘roq qilinayotgan gumonlanuvchiga nisbatan kuch ishlatishi ortidan vafot etgan.
“Chiroqchi voqeasi” aybdorlari ishini ko‘rib chiqqan Oliy sud sudyasi Kamoliddin Tolliboyev raisligidagi sudlov hayʼati marhum Yusuf Abdurahmonov o‘limida ayblanganlar — Chiroqchi tumani IIO FMB 4-sonli IIB boshlig‘i lavozimida ishlagan Nurbek Ovlayevni 9 yilga, jinoyat qidiruv guruhi tezkor vakili lavozimida ishlagan Anvar Jonqobilovni 8 yil 6 oyga, 4-sonli IIB profilaktika inspektori lavozimida ishlagan Sherzod Rahmonovni 6 yilga, Adham Tojinorovni 5 yil 6 oyga ozodlikdan mahrum qilingandi. Chiroqchi tumani IIO FMB 4-sonli IIB jinoyat qidiruv guruhi tezkor vakili lavozimida ishlagan Boburmirzo G‘ayratovga esa 2 yil IIBda hamda boshqa mansabdorlik vazifalarida ishlash huquqidan mahrum qilib, 4 yil ozodlikni cheklash jazosi tayinlagandi.
Andijonlik fuqaro o‘limiga sababchi bo‘lganlar ham jazosiz qolmadi, albatta. 2020-yil 27-noyabr kuni Jinoyat ishlari bo‘yicha Andijon viloyat sudi binosida sudlanuvchilar D.Hamraliyev 9 yilga, Qodirov, Rayimjonov va Hasanboyevlar 10 yilga, P.Mamajonov 8 yil 6 oyga, A.To‘raqulov 1 yil muddatga ozodlikdan mahrum qilindi.
Izoh (0)