O‘zbekiston inson huquqlari “Ezgulik” jamiyati faoli Abdurahmon Tashanov Ichki ishlar vazirligining Jazoni ijro etish departamenti yordami bilan ikki mahkum — Dauletmurat Tojimuratov hamda bloger Otabek Sattoriy bilan uchrashuv o‘tkazgani xabar berilgandi. Abdurahmon Tashanovning “Daryo”ga bildirishicha, Dauletmurat Tojimuratov uchrashuv davomida mahkumlarning osh-ovqatini yaxshilash, boshqa sharoitlarni tuzatish bo‘yicha taklif bermoqchiligini bildirgan.
Dauletmurat avvaliga o‘zini biroz asabiy tutdi. 2023-yilning 25-dekabr kuni uni jazoni ijro etish muassasasi tartibini buzganlikda ayblashibdi. Men unga “buni huquqiy yo‘l bilan bartaraf qiling, axir siz huquq himoyachisi bo‘lgansiz, sudga bering”, dedim. Ko‘ndi. So‘ng xat va banderollarning kechikib kelayotganidan, yozgan xatlari tashqariga chiqishi qiyin bo‘layotganidan shikoyat qildi, — deydi Tashanov.
Inson huquqlari faoliga ko‘ra, Tojimuratov o‘ziga nisbatan advokatlari tomonidan ilgari surilayotgan qiynoq iddaolarini izohlar ekan, dastlabki tergovlar davrida sochining majburiy olinish jarayonida xodimlarga faol qarshilik ko‘rsatgani, o‘z navbatida xodimlar ham u bilan ziddiyatga borib, jismoniy kuch ishlatganini ta’kidlagan.
Boshqa konkret qiynoq holatlari bo‘yicha gapirmadi. Dauletmurat koloniya rahbarlarini juda yaxshi odamlar, ular bilan munosabatlarim juda yaxshi, dedi. “Lekin hamma narsa ularning qo‘lida emas, men jazoni ijro etish tizimini o‘zgartirish bo‘yicha ko‘p takliflar beryapman, boisi qonunchilikda mahkumlar bilan uzoq muddatli uchrashuvlar qattiq tartibli koloniyalarda ham, umumiy tartibdagisida ham, uzoq muddatga qamalgan va yengilroq jazo olganlarga ham bir xil. Mahkumlarning osh-ovqatini yaxshilash, boshqa sharoitlarni tuzatish bo‘yicha ko‘p gapiraman dedi, — deydi Abdurahmon Tashanov.
Tashanovning qo‘shimcha qilishicha, Nukus voqealari bo‘yicha aybdor deb topilgan mahkum o‘qish uchun kitoblar so‘ragan.
Uning ta’kidicha, koloniyada mahkumlarning yaqinlari bilan uchrashuvlar davrida nazorat haddan tashqari kuchli, bu esa mahkumlar huquqini kamsitishdek ko‘rinadi. Koloniya ma’muriyatini qonunlardan og‘ishmaslik, ularga qattiq rioya qilishga chaqirdim. Hammaning ko‘nglini bir xilda topish qiyin, bu yerda yagona ustuvorlik faqat qonun-qoidalarga amal qilishga berilishi kerak, — deydi deydi Abdurahmon Tashanov.
2023-yilning 31-yanvar kuni Buxoro viloyatida o‘tkazilgan birinchi instansiya sudi Jinoyat ishlari bo‘yicha Qoraqalpog‘iston sudi sudyasi Elubay Abibullayev raisligida bo‘lib o‘tgan yig‘ilishda 22 nafar sudlanuvchiga nisbatan hukm eʼlon qilingandi. Xususan, “El xizmetinde” gazetasi muharriri va bloger Dauletmurat Tojimuratov 16 yilga ozodlikdan mahrum etilgan, Kallixonova, Turdanov, Smetullayev va Nuratdinov sud zalidan ozod qilingan edi.
Izoh (0)