Namanganlik 27 yoshli shaxs o‘z uyida ikki ayolni fohishalikka majbur qilgani uchun 5 yilga ozodlikdan mahrum qilingan. Hodisa tafsilotlarini eshitib yoqa ushlaysan kishi. “Daryo” mazkur holatni ommaga olib chiqishdan avval ming bir istihola qildi. Boshqalarni ham ogohlikka chaqirish, farzand necha yoshda bo‘lmasin, yurish-turishiga eʼtiborli bo‘lish lozimligini bildirish uchun ham hodisa tafsilotlarini ochiqlash lozim deb topildi.
Qo‘shmachilik
Namanganlik Shahrizod (ism o‘zgartirilgan) Andijon tibbiyot institutiga katta umidlar bilan o‘qishga kiradi. Ota-onasi “o‘g‘lim qiynalmasin”, deb Andijon shahridan uy ham olib beradi. Ammo uning yengiltak ayollar bilan munosabati o‘qishiga ham taʼsirini ko‘rsatib, institutdan haydalib ketadi.
U qo‘shmachilik qilgani uchun 2023-yili birinchi marta maʼmuriy javobgarlikka tortiladi. Jinoyat ishlari bo‘yicha Xo‘jaobod tuman sudining 2023-yil 30-martdagi hukmi bilan Jinoyat kodeksining 131-moddasi 1-qismi (g‘arazli yoki boshqa past niyatlarda qo‘shmachilik qilish) bilan aybli deb topilib, 180 soat majburiy jamoat ishlariga jalb qilinadi. Ammo yigit ming bir bahona bilan jazodan bo‘yin tovlab yurgani ortidan sud tayinlagan jazo o‘talmay qoladi.
Tanishuv
2021-yili Shahrizod yoshi o‘zidan ancha katta, bir nafar nogiron farzandi bor Oynura (ism o‘zgartirilgan) bilan tanishib qoladi. Yigit 2023-yilning noyabrida ayol bilan qonuniy nikohdan o‘tadi va uning o‘g‘lini otaliqqa oladi.
Keyinroq 2024-yilning aprel oyida Oynura ijaraga uy izlab yurgan Mavjudani (ismi o‘zgartirilgan) yosh bolasi bilan birga uyga yetaklab keladi. Shahrizod yosh bolasi bilan ko‘chada qolmasligi uchun ayolga uyidan joy beradi va ular birgalikda yashay boshlaydi.
Tadbir
2024-yilning 1-may kuni tungi soat 20:00 larda ichki ishlar xodimlariga kelib tushgan xabarga ko‘ra, Shahrizodning yashash uyda tezkor tadbir o‘tkaziladi. Guvohlar bilan xonadon ko‘zdan kechirilganda Oynura va Mavjuda 600 ming so‘m evaziga ikki nafar erkak bilan jinsiy aloqa qilishga kelishilgani aniqlanadi.
O‘rganishlar davomida Shahrizod telefon orqali o‘zini Shohrux deb tanishtirib, turmush o‘rtog‘i Oynura va uning uyida yashab kelayotgan Mavjudani zo‘rlik ishlatish bilan qo‘rqitib, jinsiy aloqa qilishga majbur qilib kelgani ayon bo‘lgan. Bundan kelib tushgan pullarni esa o‘zining shaxsiy ehtiyojlari yo‘lida sarflagan. Ish hujjatlari sudga yuboriladi.
Suddagi ko‘rsatmalar
Shahrizod:
— Aybimga qisman iqrorman. Men Andijon davlat tibbiyot instituti talabasi edim, oilaviy sharoitim yomonlashgani va moddiy tomondan qiynalganim uchun o‘qishni vaqtinchalik to‘xtatishga majbur bo‘ldim.
Oynuraning farzandini boqish uchun qaramog‘imga olgandim. U ilgari ham pul evaziga jinsiy aloqa bilan shug‘ullanib kelgan. Uning o‘zi boshqalarga intim xizmat ko‘rsatish orqali pul topishni taklif qilgandi. Mijozlarni ham o‘zi topgan, pullarni olish uchun mijozlar bilan ham o‘zi uchrashardi.
Mavjuda ham fohisha edi. Farzandi bilan ko‘chada qolgani uchun uni uyimga taklif qilganman. U Oynura bilan birgalikda tanasini sotib, pul topishni taklif qilishgandi. O‘zlari mijoz topib, ularni uyga chaqirishgan.
Men ularni majburlamaganman. Ular doimiy erkin bo‘lishgan. Bemalol ichki ishlarga aytib berishi mumkin edi. Shularni hisobga olib, suddan menga qonuniy yengillik berishlarini so‘rayman.
Oynura:
— Pulga zoriqib qolganimiz uchun Shahrizod pulga boshqa erkaklar bilan jinsiy aloqada bo‘lishni, bu paytda u ham yonimda bo‘lishini aytgandi. Men boshida rozi bo‘lmadim, lekin Shahrizod avvalgi turmushimdan bo‘lgan o‘g‘limni birinchi erimga berib yuborish bilan qo‘rqitdi. Shundan keyin bu ishga rozi bo‘ldim.
2024-yilning yanvar oyida beri meni boshqalarga intim xizmat ko‘rsatishga majburlab keldi. Mavjudani ham xuddi shunday majburlab, begona erkaklarga qo‘shib keldi. Bundan tushgan pullarni mijozlardan o‘zi olib sarflab kelgan. Ko‘chaga ham men bilan birga chiqib kelardi. Kimdandir yordam so‘rashga imkonim bo‘lmasdi. Suddan unga qonun doirasida jazo tayinlashini so‘rayman.
Mavjuda:
— Shahrizodning uyida yashashni boshlaganimdan bir-ikki kun o‘tib, yeb-ichish uchun pul berishimni so‘radi. Men ishsizligimni, pulim yo‘qligimni aytganimda u menga begona erkaklarga intim xizmat ko‘rsatib, pul topishni taklif qildi. Menda bundan boshqa yo‘l bo‘lmagani uchun rozi bo‘ldim.
Oynura bilan ichki ishlarga murojaat qilish haqida gaplashganmiz. Farzandimni olib qo‘yish bilan tahdid qilgani uchun hech kimga aytolmadim. Suddan unga nisbatan qonuniy chora ko‘rishni so‘rayman.
Dilzoda (ism o‘zgartirilgan, Shahrizodning onasi):
— Bularni hammasiga bizning befarqligimiz sabab bo‘ldi. O‘g‘limiz ertaga shifokor bo‘ladi, o‘qib yuribdi, deb o‘zimiz bilan o‘zimiz andarmon bo‘lib yuraveribmiz. Shu bola ijarama-ijara yurmasin, deb uy ham olib bergan edik.
Yengiltabiat, o‘zidan yoshi katta Oynuraga ilakishib qolib, o‘qishidan ham haydaldi. Hayoti izdan chiqib ketdi.
Bilishimizcha, Oynura avval ham fohishalik qilib kelgan. O‘g‘lim uning nogiron bolasiga rahmi kelib, otaliqqa olgandi. Hatto o‘z yonidan operatsiya qildirib, bolani davolatgan.
Mavjuda bilan Oynura avvaldan tanish bo‘lgan, ular bu ish bilan eskitdan shug‘ullanib kelishgan. Ularni bu ishga hech kim majbur qilmagan.
Suddan o‘g‘limga yengillik berishni so‘rayman.
Hukm
Sud hukmiga ko‘ra, Shahrizod Jinoyat kodeksining 135-moddasi — odam savdosi 2-qismi:
a) o‘g‘irlash, zo‘rlik ishlatish yoki zo‘rlik ishlatish bilan qo‘rqitish yoxud majburlashning boshqa shakllarini qo‘llash orqali;
b) ikki yoki undan ortiq shaxsga nisbatan;
g) aybdorga moddiy jihatdan yoki boshqa jihatdan qaram bo‘lgan shaxsga nisbatan;
d) takroran yoki xavfli retsidivist tomonidan — bandida nazarda tutilgan jinoyatni sodir etganlikda aybli deb topilgan.
O‘talmay qolgan 180 soat majburiy jamoat ishlari jazosini qisman qo‘shib, o‘tash uchun uzil-kesil 5 yil 1 oy ozodlikdan mahrum qilish jazosi tayinlangan. Mahkum jazo muddatini umumiy tartibli koloniyalarda o‘tashi belgilangan.
Izoh (0)