Qirg‘izistonda 2025-yil 1-sentyabrdan boshlab yo‘l harakatini buzgan haydovchilar to‘xtash joyida yo‘l harakati qoidalarini bilish bo‘yicha tezkor tekshiruvdan o‘tkaziladi. Bu haqda Qirg‘iziston prezidenti matbuot kotibi Asqat Alagozov ma’lum qildi.
Uning so‘zlariga ko‘ra, tashabbus prezident Sadir Japarovning topshirig‘i bilan amalga oshirilmoqda. Agar haydovchi inspektorning savollariga to‘g‘ri javob bera olmasa, uning guvohnomasi olib qo‘yiladi. Haydovchi qayta sinovdan muvaffaqiyatli o‘tsagina, hujjat qaytariladi.
Haydovchi istalgan vaqtda “Unaa”da test topshirib, guvohnomasini qaytarib olishi mumkin. Agar birinchi urinishda sinovdan o‘tish imkoni bo‘lmasa, keyinroq qayta topshiradi, dedi Alagozov.
Yangilik yo‘l-transport hodisalari sonini kamaytirishga qaratilgan. Rasmiylarning hisob-kitoblariga ko‘ra, 2020-yilgacha haydovchilik guvohnomalarining katta qismi o‘qitilmasdan berilgan.
Ko‘pchilik xarid orqali guvohnomalarga ega bo‘ldi. Hozir bu amaliyot butunlay to‘xtatilgan va hamma o‘qigandan keyingina guvohnoma oladi. Biroq yo‘llarda hali ham elementar qoidalarni bilmaydiganlar bor, dedi u.
Alagozov bilimidagi kamchiliklarni sezgan haydovchilarga ularni hozirdanoq bartaraf etishni maslahat berdi.
Agar 1-sentyabrdan keyin haydovchilik guvohnomangiz vaqtincha “Unaa”ga yuborilsa, g‘azablanmang. Butun jarayon videoga yozib olinadi. Birinchidan, hech kim YPX inspektorlarini ayblash imkoniga ega bo‘lmaydi. Ikkinchidan, qoidalarni bilmaydigan shaxslarning o‘zi noqulay vaziyatga tushib qoladi, deya ta’kidladi davlat rahbari matbuot kotibi.
Ma’lumot o‘rnida, “Unaa” transport vositalari va haydovchilar tarkibini ro‘yxatga oluvchi davlat agentligi hisoblanadi.
Izoh (0)