Qirg‘iziston prezidenti Sadir Japarov internetda haqorat va tuhmat uchun jarimalar to‘g‘risidagi qonunni imzoladi. Hujjat Erkin-Too gazetasida e’lon qilingan.
Hujjat o‘n kundan keyin kuchga kiradi. Dastlab u tuhmat va haqorat uchun jismoniy shaxslarga 100 ming som, yuridik shaxslarga esa 200 ming som jarima solishni taklif qilgandi.
Biroq uzoq muhokamalardan so‘ng jarima miqdori jismoniy shaxslar uchun 20 ming somgacha, yuridik shaxslar uchun 65 ming somgacha kamaytirildi. Bunda insternetdagi nima tuhmat yoki haqorat ekanini Madaniyat vazirligi o‘rniga huquqni muhofaza qilish organlari hal qiladi.
OAV va internetda haqorat va tuhmat uchun jarimalar joriy etish to‘g‘risidagi qonun loyihasi Madaniyat vazirligi tashabbusi bilan ishlab chiqilgan. Hujjat mualliflari ma’lumotlariga ko‘ra, so‘nggi paytlarda “ommaviy axborot vositalari va internet resurslari orqali tarqatilayotgan haqorat va kamsitish holatlarining ko‘payishi kuzatilmoqda”.
Sadir Japarov munosabati
Qirg‘iziston prezidenti 2024-yil 28-sentyabrda tegishli qonun nima uchun muhimligi va uni qo‘llab-quvvatlashi borasida shunday degandi:
Bu qonun nima uchun kerak? Ayni paytda fuqarolarimizning qariyb 95 foizi internetdan foydalanmoqda. Hozir shunday vaqtki, hatto ikki qo‘shni ham internet orqali janjallashishi mumkin. Biri ijtimoiy tarmoqlarda boshqasining obro‘siga putur yetkazadigan ma’lumotlarni e’lon qiladi. Natijada ular sudlashishni boshlaydilar. Ma’lumot esa yolg‘on bo‘lib chiqadi. Sudda kechirim so‘rashadi yoki tovon to‘lashadi va shu bilan tinchlanishadi.
Xuddi shunday vaziyat OAV va hokimiyat o‘rtasida ham yuzaga keladi. Ommaviy axborot vositalari hokimiyat tepasida turganlar haqida yolg‘on ma’lumotlar tarqatadi, keyin esa kechirim so‘rab, bu ma’lumotlarni o‘chirib tashlaydi, degan edi siyosatchi.
Izoh (0)