Qirg‘iziston prezidenti Sadir Japarov voizlarning uyma-uy yurishini taqiqlovchi qonunni imzoladi.
Respublika rahbarining aytishicha, bu masala juda bahsli hisoblanadi. Diniy qoidalarga ergashuvchilar Japarovdan qonunni e’tiroz bildirgan holda rad etishni so‘rashgan bo‘lsa, jamiyatning boshqa qismi esa uni imzolashni qat’iy talab qilgan.
“Jamiyat a’zolari notanish odamlarning xonadonma-xonadon yurib, eshiklarni taqillatishiga qarshi. Ular bu kezib yurgan targ‘ibotchilar kim ekanligi, ularning guvohnomasi bor-yo‘qligi, qanday tashkilot yoki yo‘nalishni targ‘ib qilayotgani va bu bizning dinimizga zid emasligini bilishni istaydilar”, deydi u.
Japarovning aytishicha, targ‘ibot uchun uyma-uy yurishlar masalasi hali to‘liq tartibga solinmagan. Xususan, bunday yurishlarga kim ruxsat berishi, ularda kimlar qatnashishi mumkinligi, qanday ma’lumot talab etilishi, qanday varaqalar yoki kitoblarni tarqatish mumkinligi aniqlanmagan.
Hozirda Qirg‘izistonda missionerlik faoliyatiga ayrim joylarda, masalan, masjidlarda, bozorlarda ruxsat berilgan. Japarov keyinchalik uyma-uy yurishlarga ham ruxsat berilishi mumkinligini, biroq buning uchun aniq qoidalar ishlab chiqilishi zarurligini ta’kidladi.
“Men bu masalaga oddiy fuqaro sifatida emas, balki mamlakat prezidenti sifatida yondashyapman. Biz faqat bugungi kun yoki shaxsiy manfaatlarimiz uchungina yashamasligimiz kerak”, deya qo‘shimcha qildi Qirg‘iziston rahbari.
Bundan tashqari, prezident jamoat joylarida yuzni to‘liq berkitadigan diniy kiyimlarni kiyishni taqiqlovchi qonunni imzoladi. Hujjatga ko‘ra, davlat hokimiyati organlari muassasalarida va jamoat joylarida fuqaroning shaxsini aniqlash imkonini bermaydigan kiyimni kiyganlik uchun javobgarlik belgilangan. Mehnat va xizmat faoliyati bilan bog‘liq yoki tibbiy ko‘rsatmalarga ko‘ra yuzni yopadigan kiyimlar bundan mustasno. Shuningdek, qonun psixologik yoki jismoniy zo‘rlik yo‘li bilan dinga majburlashni, qariyalar uyida, harbiy qismlarda yoki jazoni ijro etish muassasalarida diniy marosimlarni o‘tkazishni taqiqlaydi.
Japarov siyosiy partiyalarni diniy asosda tuzishni ham man etdi. Hujjat partiyalarning targ‘ibot kampaniyalarida diniy jihatlardan foydalanishni va siyosiy kuchlarni “xorijiy davlatlarning yuridik va jismoniy shaxslari, shuningdek, diniy tashkilotlar” tomonidan moliyalashtirishni taqiqlaydi. Yangi qonun “fuqarolar va diniy birlashmalarning o‘z faoliyatidagi mas’uliyatini belgilash” hamda bir qator qonun hujjatlarini “Din erkinligi va diniy birlashmalar to‘g‘risida”gi qonunga muvofiqlashtirish maqsadida ishlab chiqilgan va qabul qilingan.
Izoh (0)