Shavkat Mirziyoyev “Amirsoy”da Sadir Japarov bilan norasmiy uchrashuv o‘tkazdi

Shavkat Mirziyoyev Toshkent viloyatidagi “Amirsoy” kurort majmuasida Sadir Japarov bilan norasmiy uchrashuv o‘tkazdi, deb xabar bermoqda Prezident matbuot xizmati.

Ma’lum qilinishicha, 25-yanvar kuni Qirg‘iziston prezidenti tashrif bilan O‘zbekistonda bo‘ldi. Uchrashuvda yetakchilar ikki tomonlama munosabatlarning dolzarb masalalari, shuningdek, xalqaro siyosat va mintaqaviy hamkorlik yuzasidan fikr almashdi.

Qirg‘iziston prezidenti tog‘-chang‘i majmuasida yaratilgan sharoitlar va uning jahonning yuksak standartlariga mos zamonaviy infratuzilmasini yuqori baholadi.

O‘zbekiston va Qirg‘izistonda ikki mamlakatning noyob geolandshafti va xilma-xil tabiatini hisobga olgan holda kurort-rekreatsiya markazlarini tashkil etishga qaratilgan qo‘shma loyihalarni ilgari surishga kelishib olindi.

Qirg‘iziston prezidenti “Amirsoy” tog‘-chang‘i kurortini ko‘rib hayratga tushganini, xizmat ko‘rsatish darajasi Yevvropanikidan kam emasligini aytdi.

“Hamkasbim Shavkat Mirziyoyev bu yuqori darajadagi bazani noldan boshlab qurdi. Gap yo‘q, barakalla”, deb yozdi u Facebook’dagi sahifasida.

Shuningdek, hududining 94 foizini tog‘lar egallagan Qirg‘izistonda bunday tog‘-chang‘i kurortlari nega yo‘ligiga to‘xtalib o‘tdi.

“Chunki mustaqillikka erishganimizdan buyon oddiy xalqdan tortib, prezidentlargacha faqat siyosat bilan shug‘ullanib keldik. Har kuni mitinglar bo‘ldi, har kuni to‘y. Iqtisodiyot, turizm va boshqa muhim sohalarga e’tibor qaratilmadi”, dedi u.

2024-yil fevralida Belarus prezidenti Aleksandr Lukashenko ham Shavkat Mirziyoyev bilan birga “Amirsoy” tog‘ dam olish maskaniga tashrif buyurgandi. Davlat rahbarlari sportchilar va sayyohlar uchun yaratilgan sharoitlar bilan tanishib, ikki mamlakat o‘rtasidagi turizm almashinuvini kengaytirish yuzasidan fikr almashgandi. Shuningdek, yetakchilar tog‘-chang‘i trassasida birgalikda chang‘i uchgandi.

So‘nggi yillarda Bo‘stonliqda ko‘plab yangi majmualar barpo etildi, “Amirsoy”dan tashqari, “Beldirsoy-Chimyon-Nanay” kurorti kabi loyiha ham amalga oshirildi. Xususan, so‘nggi besh yilda 2 trillion so‘mdan ziyod investitsiya kiritilib, 13 mingdan ziyod o‘ringa ega 59 ta yangi turizm inshooti ishga tushirildi.

Bunday natijalar chet ellik investorlarni o‘ziga tortmoqda, yanada katta miqyosdagi loyihalarga yo‘l ochmoqda. Jumladan, ozarbayjonlik ishbilarmon Emin Agalarov bir qator yirik xorijiy kompaniyalar bilan sheriklikda Chorvoq suv ombori bo‘yida Sea Breeze Uzbekistan xalqaro turizm markazi barpo etish istagini bildirgan.

2024-yil dekabrida Shavkat Mirziyoyev Bo‘stonliq tumanida tashkil etilayotgan yangi turizm maskanini ko‘zdan kechirgandi. U yerda zarur infratuzilma yaratilib, kapsula shaklidagi uylardan iborat zamonaviy dam olish maskani barpo etilmoqda. Shuningdek, restoranlar, dor yo‘llari va chang‘i uchish maydonlari bo‘ladi.