Qirg‘izistonda amaldorlarning jazolarini monetizatsiya qilish rejalashtirilmoqda. Bu haqda Prezident va Vazirlar Mahkamasi qarorlari ijrosini nazorat qilish boshqarmasi boshlig‘i Azamat Osmonov ma’lum qildi.
Ma’lum qilinishicha, hayfsan tarzidagi intizomiy jazo olish amaldorga ta’sir qilmasa, u mukofotdan mahrum qilinadi. Maoshi esa kesib tashlanadi. Bu mansabdor shaxsni yetarlicha rag‘batlantiradi, chunki u moddiy jihatdan cheklangan bo‘ladi. Hozirda Ma’muriy huquqbuzarliklar to‘g‘risidagi kodeksga tegishli tuzatishlar ishlab chiqilmoqda.
“Biz fuqarolar murojaatlarining sifati va muddatlarini buzganlik uchun 100 hisob-kitob ko‘rsatkichi (10 ming som, salkam 1 million 479 ming so‘m) miqdoridagi jazoni joriy qilmoqchimiz. Bu ham fuqarolar murojaatlarini lozim darajada ko‘rib chiqmagan mansabdor shaxsga nisbatan moliyaviy cheklovlarni keltirib chiqaradi”, deyiladi xabarda.
Avvalroq Qirg‘iziston prezidenti Sadir Japarov internetda haqorat va tuhmat uchun jarimalar to‘g‘risidagi qonunni imzolagandi. Jarima miqdori jismoniy shaxslar uchun 20 ming somgacha, yuridik shaxslar uchun 65 ming somgacha belgilangan. Bundan tashqari, endilikda Qirg‘izistonda to‘y va dafn marosimlarida ortiqcha xarajat qilganlar 100 ming somdan 300 ming somgacha (salkam 15 million so‘mdan 45 million so‘mgacha) jarimaga tortilishi mumkin.
O‘z navbatida, Qirg‘izistonda deputat Mirgul Temirboyeva maktablarda pul yig‘imi uchun jarima solishni taklif qilmoqda. U prezident Sadir Japarovning noqonuniy pul yig‘ish va jamoat fondlarini tashkil etishni taqiqlashiga qaramay, maktablarda pul yig‘ish davom etayotganini aytgan.
Yangi moddaga ko‘ra, davlat umumta’lim tashkilotlarida (1-sinfdan 11-sinfgacha bo‘lgan maktablar) pul mablag‘larini qonunga xilof ravishda yig‘ish jismoniy shaxslarga 200 hisob-kitob ko‘rsatkichi (20 ming som — 3 million so‘mdan ziyod) miqdorida jarima solishga sabab bo‘ladi.
Xuddi shunday holat maktablar qoshida jamoat fondlarini tashkil etish yo‘li bilan sodir etilgan bo‘lsa, jismoniy shaxslarga 400 hisob-kitob ko‘rsatkichi (40 ming som — 6 million so‘mdan ortiq), yuridik shaxslarga 600 hisob-kitob ko‘rsatkichi (60 ming som — 9 million so‘mdan ziyod) miqdorida jarima solishga olib keladi.
Izoh (0)