Қирғизистонда 2025 йил 1 сентябрдан бошлаб йўл ҳаракатини бузган ҳайдовчилар тўхташ жойида йўл ҳаракати қоидаларини билиш бўйича тезкор текширувдан ўтказилади. Бу ҳақда Қирғизистон президенти матбуот котиби Асқат Алагозов маълум қилди.
Унинг сўзларига кўра, ташаббус президент Садир Жапаровнинг топшириғи билан амалга оширилмоқда. Агар ҳайдовчи инспекторнинг саволларига тўғри жавоб бера олмаса, унинг гувоҳномаси олиб қўйилади. Ҳайдовчи қайта синовдан муваффақиятли ўцагина, ҳужжат қайтарилади.
Ҳайдовчи исталган вақтда “Унаа”да тест топшириб, гувоҳномасини қайтариб олиши мумкин. Агар биринчи уринишда синовдан ўтиш имкони бўлмаса, кейинроқ қайта топширади, деди Алагозов.
Янгилик йўл-транспорт ҳодисалари сонини камайтиришга қаратилган. Расмийларнинг ҳисоб-китобларига кўра, 2020 йилгача ҳайдовчилик гувоҳномаларининг катта қисми ўқитилмасдан берилган.
Кўпчилик харид орқали гувоҳномаларга эга бўлди. Ҳозир бу амалиёт бутунлай тўхтатилган ва ҳамма ўқигандан кейингина гувоҳнома олади. Бироқ йўлларда ҳали ҳам элементар қоидаларни билмайдиганлар бор, деди у.
Алагозов билимидаги камчиликларни сезган ҳайдовчиларга уларни ҳозирданоқ бартараф этишни маслаҳат берди.
Агар 1 сентябрдан кейин ҳайдовчилик гувоҳномангиз вақтинча “Унаа”га юборилса, ғазабланманг. Бутун жараён видеога ёзиб олинади. Биринчидан, ҳеч ким ЙПХ инспекторларини айблаш имконига эга бўлмайди. Иккинчидан, қоидаларни билмайдиган шахсларнинг ўзи ноқулай вазиятга тушиб қолади, дея таъкидлади давлат раҳбари матбуот котиби.
Маълумот ўрнида, “Унаа” транспорт воситалари ва ҳайдовчилар таркибини рўйхатга олувчи давлат агентлиги ҳисобланади.
Изоҳ (0)