AQSHning Denver aeroportida samolyot yonib ketdi. Bu haqda Fox News telekanali xabar qilmoqda.
Telekanal ma’lumotlariga ko‘ra, yo‘lovchilar samolyot qanoti orqali evakuatsiya qilingan. Jabrlanganlar va yong‘in sabablari haqida hozircha ma’lumot berilmagan.
Denver xalqaro aeroporti o‘z navbatida reysning barcha yo‘lovchilari evakuatsiya qilinganini, hech kim jabrlanmaganini ma’lum qildi.
172 nafar yo‘lovchi va olti nafar ekipaj a’zosi qo‘ndi va terminalga yo‘l oldi. Biz ekipaj a’zolarimiz, DEN jamoasi va qutqaruvchilarimizga tezkor va qat’iy harakatlari uchun minnatdorchilik bildiramiz, chunki bortdagi va yerdagi barchaning xavfsizligi ustuvor ahamiyatga ega, deyiladi aviakompaniya xabarida.
Shot Telegram kanali ma’lumotlariga ko‘ra, yonib ketgan samolyot American Airlines aviakompaniyasiga tegishli Boeing 737-800 bo‘lgan. U Kolorado Springsdan uchib kelgan va to‘g‘ridan to‘g‘ri uchish-qo‘nish yo‘lagida alanga olgan. Dastlabki ma’lumotlarga ko‘ra, laynerning yonilg‘i baki yonib ketgan.
Avvalroq Farg‘ona xalqaro aeroportida Novosibirskdan S7-5561 reysi bilan uchgan S7 Airlines aviakompaniyasining Boeing 737-800 samolyoti g‘ildiragi chiqib ketishi oqibatida uchish-qo‘nish yo‘lagida qolib ketgani xabar qilingandi.
Sudan armiyasiga tegishli samolyot 25-fevral kuni Omdurman shahri shimolidagi aholi yashaydigan hududda halokatga uchragandi. 19-fevral kuni esa AQSHning Arizona shtati osmonida kichik samolyotlar to‘qnashishi natijasida ikki kishi halok bo‘lgandi.
Izoh (0)