Muhammad Saloh Angliya Premyer Ligasida chempionlik uchun asosiy da’vogar qaysi jamoa ekanligini aytdi

“Liverpul” hujumchisi Muhammad Saloh joriy mavsum Angliya Premyer Ligasida qaysi jamoani chempionlikka asosiy da’vogar deb bilishini aytdi. Bu haqda DailyAFC nashri xabar berdi.

Jurnalistlardan biri misrlik futbolchidan “Arsenal” haqida fikrini so‘raganida, Saloh ochiqchasiga “kanonirlar”ni chempionlik uchun eng asosiy favorit deb hisoblashini ma’lum qilgan:

Sizning jamoangiz bu mavsumda juda yaxshi o‘ynamoqda. Chempionlik uchun ajoyib imkoniyatlaringiz bor. Menimcha, “Arsenal” favorit, chunki jamoa tarkibidagi ko‘plab futbolchilar so‘nggi besh yildan beri birga o‘ynashyapti. Ular bir-birini yaxshi tushunadi, — deya ta’kidlagan Saloh.

🗣️ Mohamed Salah on Arsenal: “I think you have a great team this season. You have a really good chance. I think you are FAVOURITES now because you have players that have been together for five years.” 🤯🏆
pic.twitter.com/jA8kw9ZFw2

— DailyAFC (@DailyAFC) August 19, 2025

Eslatib o‘tamiz, 33 yoshli Muhammad Saloh o‘tgan mavsum “Liverpul” bilan Angliya Premyer Ligasi chempioniga aylangan edi. U musobaqaning eng yaxshi to‘purari hamda eng ko‘p golli uzatma bergan futbolchisi bo‘lgan. O‘tgan hafta esa Saloh Angliya Professional futbolchilar assotsiatsiyasi tomonidan “Yil futbolchisi” sovriniga loyiq deb topildi.