Turkiya portlarida kemalardan Isroil bilan aloqador emasligini va ushbu mamlakatga harbiy yoki xavfli yuk olib ketmayotganini tasdiqlovchi yozma kafolat xati talab qilinmoqda. Bu haqda ikki mustaqil yuk tashish manbalariga tayanib, Arab News xabar berdi.
Manbalarning aytishicha, port kemalarga bunday kafolat xatini taqdim etishni og‘zaki ravishda so‘ragan, rasmiy hujjat yoki farmoyish hozircha mavjud emas. Ko‘rsatma Turkiyaning barcha portlariga taalluqliligi aytilmoqda. Transport vazirligi hozircha bu borada rasmiy izoh bergani yo‘q.
“Kafolat xatida kemaning egasi, boshqaruvchisi yoki operatori Isroil bilan hech qanday aloqaga ega emasligi, shuningdek bortda portlovchi modda, radioaktiv material yoki harbiy jihozlar yo‘qligi ko‘rsatilishi kerak”, degan manbalardan biri.
Ma’lumot uchun, Turkiya va Isroil o‘rtasidagi munosabatlar uzoq yillik tarixga ega bo‘lib, mintaqaviy va siyosiy jarayonlar fonida ko‘plab o‘zgarishlarga duch kelgan. Ikki davlat o‘rtasida 1990-yillarda diplomatik aloqalar shakllantirilib, savdo va harbiy sohalarda hamkorlik rivojlangan. Biroq Turkiya 2024-yil boshida G‘azodagi urush sabab Isroil bilan yillik qiymati 7 milliard dollar bo‘lgan savdo aloqalarini to‘xtatib qo‘ygan.
Izoh (0)