Судан армиясига тегишли самолёт 25 февраль куни Омдурман шаҳри шимолидаги аҳоли яшайдиган ҳудудда ҳалокатга учради. Оқибатда 20 дан ортиқ киши, жумладан, ҳарбийлар ва тинч аҳоли ҳалок бўлди. Бу ҳақда ҳарбий ва тиббиёт манбаларига таяниб, Al Arabiya хабар берди.
Судан армияси самолёт авиабазадан кўтарилаётган пайтда қулаганини маълум қилди. Жабрланганлар касалхонага етказилган. Ўт ўчирувчилар ҳалокат жойидаги ёнғинни бартараф этган. Ҳозирда вайроналар остидан одамларни қидириш ишлари олиб борилмоқда.
Манбаларга кўра, “Антонов” самолётининг қулашига техник носозлик сабаб бўлган. Ҳалокат Вади Сейдна авиабазаси яқинида юз берган. Гувоҳлар самолёт қулаган ҳудуддаги бир нечта уйларга зарар етганини айтмоқда.
Омдурман шимолида яшовчи аҳоли ҳалокат оқибатида кучли портлаш содир бўлгани ва бу бир қанча маҳаллаларда электр таъминотида узилишларга сабаб бўлганини таъкидлади. Ҳалок бўлганлар орасида Суданда таниқли бригада генерали, Хартум ҳарбий округининг собиқ қўмондони Баҳор Аҳмад ҳам бор.
Судандаги вазият 2023 йил апрель ойида Суверен кенгаш (мамлакатнинг вақтинчалик бошқарув органи) раиси, армия қўмондони Абдул Фаттоҳ ал-Бурхон ва Тезкор ҳаракат кучлари (ТҚК) раҳбари Муҳаммад Ҳамдан Дагало ўртасидаги келишмовчиликлар туфайли кескинлашди.
Улар ўртасидаги асосий зиддиятлар ягона қуролли кучларни шакллантириш муддатлари ва усулларига, шунингдек, бош қўмондон лавозимини ким эгаллаши кераклигига боғлиқ. Ал-Бурхон бу лавозимга профессионал ҳарбий шахс тайинланишини ёқласа, Дагало эса сайланган фуқаро президенти бўлиши кераклигини таъкидламоқда.
Изоҳ (0)