Vashingtondagi yo‘lovchi samolyoti va harbiy vertolyot halokati bo‘yicha yangi tafsilotlar paydo bo‘ldi

Yanvar oyi oxirida Vashingtonda yo‘lovchi samolyoti bilan to‘qnashgan Black Hawk harbiy vertolyoti ekipaji aviadispetcherning layner ortidan o‘tish bo‘yicha ko‘rsatmasini eshitmagan bo‘lishi mumkin. Bu haqda tergovchilarga tayanib CBS telekanali xabar berdi

Vashington shahri, Kolumbiya okrugi osmonida American Airlines samolyoti bilan havoda to‘qnashib, Potomak daryosiga qulab tushgan Black Hawk harbiy vertolyoti ekipaji aviadispetcherning samolyot ortidan o‘tish haqidagi ko‘rsatmalarini eshitmagan bo‘lishi mumkin, deyiladi xabarda.

To‘qnashuvdan 17 soniya oldin berilgan aviadispetcherning ko‘rsatmasi ikkala havo kemasi bort yozuv qurilmalarida ham qayd etilgan. Telekanal ma’lumotlariga ko‘ra, tergovchilar Black Hawk ekipaji samolyot ortidan o‘tish buyrug‘ini eshitmagan bo‘lishi mumkin, deb taxmin qilmoqda, chunki aynan shu paytda vertolyot ekipaji mikrofon tugmasini bosgan.

Vashingtonning Ronald Reygan nomidagi aeroportida 29-yanvar kuni American Airlines aviakompaniyasining mintaqaviy Bombardier CRJ700 yo‘lovchi samolyoti qo‘nishga yaqinlashayotganda Sikorsky H-60 (Black Hawk) harbiy vertolyoti bilan to‘qnashgan edi. Layner bortida 60 nafar yo‘lovchi va to‘rt nafar ekipaj a’zosi, vertolyot bortida esa uch kishi bo‘lgan. Ulardan hech biri omon qolmagan. Bu AQSHda so‘nggi 15 yil ichidagi eng yirik aviahalokat bo‘lgani aytilmoqda.

The New York Times gazetasi AQSH Fuqarolik aviatsiyasi federal boshqarmasining dastlabki hisobotiga asoslanib, to‘qnashuv paytida dispetcherlik smenasi to‘liq bo‘lmagani, bir mutaxassis bir vaqtning o‘zida bir nechta vazifalarni, jumladan, vertolyotlar harakatini muvofiqlashtirish va samolyotlarni qo‘ndirish ishlarini bajarganini avvalroq xabar qilgan edi. AQSH Fuqaro aviatsiyasi federal boshqarmasining dastlabki hisobotiga ko‘ra, navbatchi aviadispetcher hodisa kuni odatda ikki xodim bajaradigan vazifani yolg‘iz o‘zi amalga oshirgan. NYTning qo‘shimcha qilishicha, yo‘lovchi samolyotining harbiy vertolyot bilan to‘qnashuvi vertolyot belgilangan balandlikdan yuqoriroq parvoz qilgani sababli yuz bergan.