Ukraina prezidenti Vladimir Zelenskiy Kiyev bosib olingan hududlarni hech qachon Rossiyaniki deb tan olmasligini yana bir bor ta’kidladi. Uning so‘zlariga ko‘ra, bu masala mamlakat uchun “asosiy qizil chiziq” bo‘lib qoladi. Ukrainaliklar yetakchisi bu haqda 12-mart kuni Jidda shahridagi AQSH-Ukraina muzokaralari munosabati bilan o‘tkazilgan brifingda ma’lum qildi.
Ukrainaliklar yetakchisi mamlakat suverenitetini himoya qilish uchun urushda ko‘plab qurbonlar berilganini eslatdi.
Biz Rossiya tomonidan bosib olingan hech qaysi hududni ularniki deb tan olmaymiz. Bu – haqiqat. Xalqimiz buning uchun kurashdi, qahramonlarimiz hayotini fido qildi. Juda ko‘p inson yaralandi, juda ko‘p azob chekildi. Shu sababli hech kim buni unutmaydi. Men “hech kim unutmaydi” deganimda, bu biz uchun asosiy qizil chiziq ekanini nazarda tutyapman, dedi Zelenskiy.
AQSH—Ukraina muzokaralari
Saudiya Arabistonida bo‘lib o‘tgan uchrashuvdan so‘ng Qo‘shma Shtatlar Ukrainaga harbiy yordam va razvedka maʼlumotlari almashinuvini tikladi. Shu bilan birga, Kiyev Vashington tomonidan ilgari surilgan 30 kunlik sulh taklifini qabul qildi. Mazkur muddat ichida tomonlar urushni butunlay tugatish bo‘yicha muzokaralar olib borishi ko‘zda tutilgan.
Jidda shahrida ilgari surilgan taklif dunyoning yetakchi davlatlari tomonidan ijobiy qabul qilindi. Biroq endi hamma Moskvaning javobini kutmoqda.
Rossiya prezidenti matbuot kotibi Dmitriy Peskovning ma’lum qilishicha, Kreml mazkur taklif tafsilotlarini o‘rganishi lozim.
AQSH senatori Rossiya vaqtinchalik sulhga rozi bo‘lib, muzokaralar stoliga o‘tirishi lozimligini, aks holda mamlakatga qarshi qo‘shimcha sanksiyalar qo‘llanishini aytdi.
Izoh (0)