Nafaqat o‘zbek kino olamida o‘z o‘rniga ega bo‘lgan, balki chet el kinofilmlarida suratga tushib, muvaffaqiyatga erishgan, “Mening akam bo‘ydoq”, “Orzudagi ayol”, “Makrli dunyo”, “So‘nggi istak” kinokartinalaridagi roli bilan muxlislarning qalbidan joy olgan aktrisa, boshlovchi Sitora Farmonova 20-avgust kuni 41 yoshni qarshi oldi. Shu munosabat bilan uning hayoti va ijodiy faoliyatiga nazar solamiz.
“Bolaligimda urishqoq bo‘lganman”
Aktrisa Sitora Farmonova 1984-yilning 20-avgustida Buxoro shahrida tug‘ilgan. U oilada uch nafar farzandning to‘ng‘ichi, aktrisaning ukasi va singlisi bor.
— O‘ziga to‘q, ilmli insonlar oilasida tug‘ilganman. Bobom rahmatli bir umr direktorlik qilgan, qattiqqo‘l inson edi. Yozgi taʼtil kunlari bobomning uyiga borardik. Ertalab uyg‘onib, eshik oldida 20 ta nabira terilib turardik. Qo‘limizni ko‘ksimizga qo‘yib, bobom bilan birma-bir salomlashardik. Bolaligimda nihoyatda to‘polonchi, o‘g‘il bolalarga xos xarakterdagi qiz edim. Urishishni yaxshi ko‘rardim. Deyarli har kuni direktor xonasiga chaqirib tanbeh berardi. Biror marta ustim toza bo‘lib uyga borgan kunimni eslolmayman. Maktabdan qaytayotganda yo‘ldagi ariqdan kim tez sakrash bo‘yicha musobaqalashardik. Suvga tushib ketgan, balchiqqa qorilgan kunlarim ham bo‘lgan. Ammo o‘qishni yaxshi ko‘rardim, baholarim ham aʼlo edi. O‘qituvchilarim “Feʼli chatoqda, ammo o‘qishi yaxshi” deyishardi. Buvilarimning ikkisi ham chevar edi. Shu sabab bolaligimdan dizaynerlikka qiziqqanman. Kelajakda shu kasbni egallayman deb niyat qilardim, deydi aktrisa Sitora Farmonova.
“Dadam klinik o‘limga uchragan”
Sitora Farmonova 13 yoshga to‘lganida oilasi bilan Toshkentga ko‘chib kelgan. Afsuski, oila boshlig‘ining birdan kasallikka chalinishi oila uchun nihoyatda og‘ir kechgan.
— Dadam onamni qizg‘anib, uydan tashqariga chiqarmagan. Hatto, Buxoroda ham onam uyimizdan ikki bekat nariga borsa, adashib qolardi. Onam hech qayerda tahsil olmagan uy bekasi edi. Dadam esa o‘z davrida ko‘p pul topgan tadbirkor edi. Ammo taqdir charxpalagi shunday aylandiki, dadam yurak bilan bog‘liq kasallikka chalindi.
Buxoroda uyimizda qo‘sha-qo‘sha xizmatkorlari bo‘lgan oila birdan hammasidan ayrilgandek bo‘ldi. Maktabdan qaytsam dadam xonasida ekan. Uni ovqatlanishga chaqirgani chiqqanimda hushsiz ekanini ko‘rib shokka tushganman. U nafas olmasdi. Baxtimizga qo‘shnimiz professor edi. U dadamning ahvolini ko‘rib tez yordamga qo‘ng‘iroq qildi va birinchi yordamni ko‘rsatdi. Onamning aytishicha, shifokorlar “Oila aʼzolari xayrlashib olishsin, hammasi tamom”, deyishgan ekan. O‘sha paytda dadam klinik o‘limni boshdan kechirgan. Ammo professor qo‘shnimizning bergan birinchi yordami bilan o‘ziga kelgan. Ammo u avvalgidek ishlashi mumkin emasdi, deydi aktrisa Sitora Farmonova.
“15 yoshda ro‘zg‘or yuki boshimga tushdi”
Oilaning boshiga tushgan musibatdan so‘ng aktrisaning onasi ish izlashni boshlaydi. Ammo shuncha yil uydan ko‘chaga chiqmagan ayol qanday qilib pul topishni o‘ylab boshi qotadi. To‘ng‘ich farzandi esa ro‘zg‘or yukini o‘z zimmasiga oladi.
— O‘shanda 9-sinfda o‘qirdim. Uch farzandmiz, u kunga kelib jamg‘argan pulimiz ham qolmagan edi. Shunda uyimiz yonidagi kafega kirib ish so‘raganman. “Yordamchi bo‘laman, faqat ish yo‘q demang”, deb iltimos qilganman. Asosan ertangi kun uchun kerakli sabzavotlarni artib, tozalashga qarashardim. Maktabdan qaytib to kechgacha tog‘ora-tog‘ora piyoz, kartoshka va sabzilarni tozalardim. Keyin kafeda shirinlik sotish taklifini berdim. “Qayerdan olamiz”, deyishganda o‘zim pishirib kelaman, dedim. Uyga borib onam bilan maslahatlashib, pahlava va to‘rtburchak tort pishirdik. Shirinliklar mijozlarga yoqqanidan keyin har kuni pishirib, maktabga ketish oldidan kafega topshirib ketadigan bo‘ldim. Bu ham ro‘zg‘orimizga qo‘shimcha yordam edi. Charchardim, ammo ilojsizlikdan shu ishlarni qilishga majbur edim. Eng alamlisi, kafeda ishlayotganimni bilgan ayrim erkaklar “Shu chiroying bilan shu yerda ishlayapsanmi?” deb jirkanch takliflarni berishardi. Ammo hech qachon o‘zimni yo‘qotmaslikka va ota-onamning yuzini yerga qaratmaslikka harakat qilganman, deydi aktrisa.
“Tasodifan aktrisa bo‘ldim”
Aktrisa moliyaviy jihatdan qiynalgan kunlarida hammasi yaxshi bo‘lishini umid qilgani haqida ham so‘zlab bergan.
— O‘sha paytlarda uyali telefonlar unchalik ommalashmagan davrlar edi. Ammo shunday telefondan foydalanadiganlarga hammaning havasi kelardi. Qaysidir bir jurnalda uyali telefonning katta rasmi chiqqan. Uni qirqib olib, oynaga qarab xuddi telefonda gaplashayotgandek o‘zimni tutardim.16 yoshimda tasodifan klip syomkasiga taklif etishgan. “Chiroyli ekansiz”, deyishsa xursand bo‘lib, syomkaga boribman. O‘shanda kichik epizod rolni ijro etganman. Ammo shunaqa xursand bo‘lganman, buni so‘z bilan tasvirlab berib bo‘lmaydi. Undan keyin “Ayol zoti” filmida ham kichik epizodni ijro etganman. 2004-yili “Xavfli burilish” filmiga taklif etishgan. Haqiqatan ham film muvaffaqiyatli chiqdi. Keyin yiliga kamida 3-4 ta filmlardan takliflar tushishni boshladi. Shundan keyin bor eʼtiborimni aktrisalikka qaratishga qaror qildim. Ammo dizaynerlikka bo‘lgan qiziqishim so‘ngani yo‘q. Haligacha, o‘zim uchun libos dizaynlarini tuzaman, deydi aktrisa.
Aktrisaga qimmatga tushgan “Baykonur”
Aktrisa Sitora Farmonova “Baykonur” filmida yiqilib tushib og‘ir jarohat olgan. Bu haqda uning onasi Zamira Farmonova intervyularining birida aytib o‘tgan.
— Qizim Sitora nemis rejissyori suratga olayotgan “Baykonur” filmida suratga tushgan. Juda yaxshi rol o‘ynagan. Kinoning suratga olish jarayonida atrofiga marmar terilgan suzish havzasiga nimadir bo‘lib yiqilib tushgan. Shundan keyin uning bo‘yni yirtilib ochilib qolgan. Shifokorga olib borishgan, tikamiz deyishgan.
Rejissyor esa tikish mumkin emas, bu qiz bizda rol o‘ynayapti, har bir kunimiz belgilangan uning jarohati qachon bitadi deb kuta olmaymiz degan. Tikishga ruxsat bermagandan keyin qizim motosilkni ijaraga olib shifokorga o‘zi borib davolangan.
Rol o‘ynab bo‘lgandan keyin uyga keldi, shunda qarasam bo‘ynida bint bor. Bo‘yningga nima qildi desam, hech narsa dedi. Ko‘rsatmaguncha qo‘ymadim, keyin qarasam 3-4 sm joy yirtilib ochilib qolgan. Shunda shifokorlar shukr qiling, bu jarohat bilan tirik qolish kamdan-kam uchraydi degan. O‘shanda shu ahvolda bo‘lsa ham suratga olish jarayonlarining oxirigacha ishtirok etgan. Eslasam yig‘layman, juda yomon bo‘lib ketaman, onaga qiyin, deydi aktrisaning onasi.
“Sahna ortida yig‘laganman”
Bundan tashqari, aktrisa Rossiyada bo‘lib o‘tayotgan “Quvnoqlar va zukkolar” o‘yini jarayonida ham qattiq yiqilganini yodga oladi.
— Sahnaga chiqqanimizda butun tanam bilan orqaga qarab yiqilib ketganman. Butun zaldagi tomoshabinlar qo‘rqib ketishgan. Hatto Maslyakov ham xavotirga tushgan. Shunda zo‘rg‘a o‘zimni tutib, joyimdan turganimda jamoamiz sardori “O‘zingni qo‘lga ol, faqat yig‘lab yuborma”, deganida ko‘z yoshlarimni tiyib, yuzimni qo‘lim bilan yashirib olganman. Suratga olish ishlari tugaganida esa sahna ortiga o‘tib, og‘riqdan rosa yig‘laganman, deydi aktrisa.
“Behayo filmni rad etib, 700 ming dollardan voz kechdim”
Aktrisa Sitora Farmonovaga behayo sahnalari bo‘lgan Gollivud filmida suratga tushish uchun 700 ming dollar gonorar taklif qilishgani haqida aytib o‘tgandi.
— 2008-yilda menga Gollivuddan taklif bo‘lgan. Bu Sony Entertaiment Production va TNT telekanalining qo‘shma loyihasi edi. Qo‘limga qiymati 700 ming dollar bo‘lgan ikki yillik shartnoma kelib tushgan. Bu taklifdan judayam xursand bo‘lganman. Lekin keyin bilsam serialning 50-qismidan keyin uyatsiz sahnalari boshlanar ekan. Men bunday sahnalarni o‘ynamayman, deganimda, menga sizda dublyor bo‘ladi, deyishgan. Lekin u sahnalarda men emas, dublyor o‘ynayotganini sahna ortidagilar biladi, tomoshabin esa bu sahnalarda meni ko‘radi.
350 ta qismli serialning 50-qismidan keyin uyatsiz sahnalar boshlanadi. Bu degani 300 ta qismda shunday sahnalar bo‘ladi, degani. Tomoshabin serialni ko‘rgani sari mendan nafratlanishni boshlaydi. “O‘zbekistondan chiqqan qiz shunaqa kinoda rol o‘ynabdi”, deyishadi.
O‘sha 700 ming dollarni oldim, bir, ikki, besh yoki o‘n yil yerman. Lekin bu kino chiqqanidan keyin dadam qanday bosh ko‘tarib yuradi? Oila aʼzolarimning holi nima kechadi? Xullas, bu taklifni rad etganman. Ko‘pchilik nega unday qilding, bu taklif orqali senga Gollivudga yo‘l ochilardi, deyishgan. Men ularga “meni Gollivudga yo‘l emas, oila aʼzolarim, urug‘-aymog‘im ko‘proq qiziqtiradi”, deganman, deydi Sitora Farmonova.
“O‘ldirib, uying eshigiga osib ketaman”
2023-yil aktrisa hayotida baʼzi noxushliklar bilan yodda qoldi. Ashaddiy muxlislaridan biri uni va oila aʼzolarini o‘ldirish bilan tahdid qildi.
— Tegishli organlarga murojaat qilganimizdan keyin, dadam u odamga “Maqsading nima?” deb savol berganida menga ham tuhmat qilibdi. “Qizingiz bilan bir yildan beri Instagram’da gaplashamiz, u menga o‘rganib qolgan. U sizga aytolmayapti, siz esa bizni tushunishga harakat qilmayapsiz”, debdi. Men yana shokka tushdim. Yaxshiyamki, yozgan gaplari saqlanib qolgandi, ularni organ xodimlariga ko‘rsatdim.
Avvaliga u meni o‘ldirmoqchi edi. Endi butun oilam, ota-onam va ukamga ham tahdid qilyapti. Yaxshi hamki, O‘zbekistonda yashaymiz. Shahar bedarvoza emas, unga nisbatan tegishli choralar ko‘riladi, deydi aktrisa Sitora Farmonova.
Uzoq kutilgan to‘y: Sitora Farmonova Dubayda turmushga chiqdi
Oq otdagi shahzodasini uzoq kutgan aktrisa Sitora Farmonova 2024-yilning noyabrida, 40 yoshida turmushga chiqdi. Toshkentdagi yaqinlari uchun “Yakkasaroy” to‘yxonasida qiz bazmini to‘ydek qilib o‘tkazdi. Kuyov bazmda qatnashmadi, Sitoraga ukasi hamrohlik qildi. Kuyovning kimligi haqidagi savollarga Sitora to‘liq javob bermadi, faqatgina katta nikoh to‘yi Dubayda yopiq tarzda bo‘lishi va birorta kamera kiritilmasligini aytgandi. Bundan tashqari u to‘yidan avval obunachilariga “Bo‘lajak turmush o‘rtog‘im arab, rus, qozoq yoki tojik emas. Kelishgan o‘zbek yigitiga sovchi orqali turmushga chiqyapman. Sevishib yurmaganmiz, oilaviy do‘st bo‘lganmiz. Ismi Muhammad, yoshi meniki bilan teng. Biznes bilan shug‘ullanadi, oilaviy Dubayda yashashadi, Toshkentga kelib turishadi”, deya ochiqlab o‘tgan edi.
— Ular bilan oilaviy do‘st bo‘lganmiz, salom-aligimiz bo‘lgan, lekin u qadar yaqin munosabatda bo‘lmaganmiz. Sevishib yurish umuman bo‘lmagan. Ular meni zimdan kuzatib yurgan ekanlar. Menga ilk gapirgan gaplari: “Sizni aslingizni, qalbingizni sevdim, tashqi ko‘rinishingizni emas”, dedilar. Ular sevgi izhor qilmagan. Biz chet elda edik. Ular yonimga kelib, qahva ichaylik, dedilar. Restoranga kirsak hammayoq chiroyli qilib bezatilgan ekan. Shunda ham hech narsani tushunmadim. Balki restoranning dekori shunaqadir, deb o‘yladim. Ular kutilmaganda “Menga turmushga chiqasizmi?”, deb so‘radilar. Umuman kutmagan bo‘lsam ham, men rozilik bildirdim, chunki ularning qalbi go‘zal inson ekanligini bilardim. Keyin otamdan mening qo‘limni so‘radi. Otam esa mendan qo‘rqqan. Qizim yo‘q, deb qolsachi, deb o‘ylagan. Keyin “Qizingizni rozi qildim”, deganidan so‘ng otam rozilik bildirgan. Shu bilan to‘y muhokamasi boshlandi. “To‘y 12-noyabrda”, degan qaror qabul qilindi, deydi boshlovchi.
“Farzandli bo‘lsam ham buni ommadan sir tutaman”
— Shu paytgacha turmush qurgan san’at vakilining xoh u ayol bo‘lsin, xoh erkak, umr yo‘ldoshini ijtimoiy tarmoqlarda nimalar deb muhokama qilishmayapti? Men turmush o‘rtog‘imni shunaqa hurmat qilaman, u inson meni baxtli qilyapti, meni kaftida ko‘tarib yuribdi. Meni turli fisq-u fasodlar, shou-biznes olami vakili bo‘lishimga qaramay, o‘zligimni sevib-ardoqlagan insonni heyterlarga xafa qildirib qo‘ygim kelmadi. Shuning uchun ularni ommaga ko‘rsatmadim. Boshida ularga aytdim, ijtimoiy tarmoqlarga qiz bazmimni qo‘yaman, lekin to‘yimizni qo‘ymayman, dedim. Ular menga “xohishingiz”, dedilar. Nikoh to‘yim Dubayda, judayam chiroyli tarzda o‘tkazildi.
Turmush o‘rtog‘im 5 yoshligida ular oilaviy Dubayga ko‘chib ketishgan, asosan, u yerda yashashadi. Qarindosh, aka-uka, opa-singillari hammasi uyoqda. Shuning uchun ham to‘yimiz aynan shu shaharda o‘tkazildi. To‘yim xuddi o‘zim xohlagandek, suv bo‘yida, orzumdagi dekoratsiyalar bilan bezatilgan holda o‘tkazildi. Ammo kelin salom va boshqa urf-odatlarimizni o‘z vatanimda o‘tkazishni xohladim, buning gashti boshqacha.
Men hali hamon oilam bilan bog‘liq ma’lumotlarni oshkor etishni istamayman, ertaga nasib etsa, farzandli bo‘lsam, buni ham ommadan sir tutaman. Chunki oila muqaddas va u yerdagi sirlar faqat insonning o‘zigagina tegishli. Oilamni ommaga hech qachon ko‘rsatmayman. Chunki men baxtli yashashni maqsad qilganman, ko‘z-ko‘z qilishni emas. Ko‘z, nazar degan narsalar bor. Nima bilan maqtansangiz, o‘sha narsangizdan ayrilasiz. Men oila degan muqaddas dargohga bir umr yashayman, deb qadam qo‘yganman, deydi aktrisa.
Izoh (0)