Buyuk Britaniya bosh vaziri Kir Starmer qo‘shinlarini Ukrainaga joylashtirishga va havo hududini qo‘riqlash uchun samolyotlarini yuborishga tayyorligini aytdi. Bu haqda “RBK Ukraina” xabar berdi.
Vazir Ukrainada tinchlik sulhini ta’minlash uchun Britaniya shunday qadam tashlashga tayyorligini aytdi. U buni 27-fevral kuni Oq uyda AQSH prezidenti Donald Tramp bilan uchrashuvdan so‘ng ma’lum qildi.
Yaqinda Yevropada natsizm ustidan qozonilgan g‘alabaning 80 yilligi nishonlanadi. Amerika hamda Buyuk Britaniya tinchlikka erishish uchun yelkama-yelka turgan edi. Hozir ham biz Ukrainadagi urushni to‘xtatish uchun birgalikda turibmiz, dedi Starmer.
U Qo‘shma Shtatlarga urushni to‘xtatish bo‘yicha yondashuvlari uchun minnatdorlik bildirdi va bu ijobiy qabul qilinishi aytdi.
AQSH bu kelishuvni qo‘llab-quvvatlash uchun samolyot va qurol-aslaha yetkazib berishi mumkin. Faqat shu yo‘l bilangina tinchlikka erishish mumkin. Biz Putinga bu urushni qayta boshlash imkoniyatini bermaymiz. Yevropa rahbarlari bu masalada bizni qo‘llab-quvvatlamoqda, dedi Starmer.
Britaniya bosh vaziri “tinchlikka erishishning yagona yo‘li bo‘lgani uchun harbiylarni tinchlikparvar sifatida yuborgan holda barcha choralarni ko‘rishga tayyor” ekanini ta’kidladi.
Men Yevropa rahbarlari bilan yaqindan hamkorlik qilmoqdaman va shuni aniq aytamanki, Buyuk Britaniya ittifoqchilarimiz bilan birgalikda kelishuvni qo‘llab-quvvatlash uchun quruqlikdagi qo‘shinlarni yuborishga va samolyotlarni havoga ko‘tarishga tayyor, chunki bu tinchlikning bardavom bo‘lishining yagona yo‘lidir, deya qo‘shimcha qildi u.
Tramp va Starmer uchrashuvi
27 fevral kuni AQSH prezidenti va Buyuk Britaniya bosh vaziri Oq uyda uchrashuv o‘tkazdi. Siyosatchilar Rossiyaning Ukrainaga qarshi urushini muhokama qildi. Tramp suhbat chog‘ida AQSH Ukraina va Rossiya bilan “yaxshi muzokaralar” o‘tkazganini ta’kidlagan. Shu tufayli tinchlik kelishuvi masalasida sezilarli yutuqlar borligini aytgan.
Uchrashuv chog‘ida Tramp Ukraina prezidenti Vladimir Zelenskiyni “diktator” deb ataganiga ishona olmasligini ham aytgan.
Men shunday dedimmi? Ishongim kelmayapti. Navbatdagi savol, deya jurnalistlar savoliga javob berdi u.
Tramp Zelenskiyni “diktator” deb atagani uchun undan kechirim so‘rashi haqidagi savolga javob bermadi.
Men uni hurmat qilaman. Biz ularga ko‘p qurol berdik, deya xulosa qildi AQSH rahbari.
Amerika yetakchisi nodir metallar bo‘yicha kelishuvni ham eslagan. U 28-fevral kuni Ukraina prezidenti Vladimir Zelenskiy bilan uni imzolashi kerak. Shu sababli 27-fevral kuni Zelenskiyning samolyoti AQSHdagi Endryus aviabazasiga qo‘ngani ma’lum qilindi.
Izoh (0)