Coindesk ma’lumotlariga ko‘ra, 25-fevral kuni bitkoin narxi 5,5 foizga pasayib, 88 ming 800 dollarga yetdi. Bu noyabr oyi o‘rtalaridan beri kuzatilgan eng past ko‘rsatkichdir. So‘nggi bir oy ichida dunyodagi eng mashhur kriptovalyuta 11,4 foizga arzonlashdi. Quyidagi buning sabablarini ko‘rib chiqamiz.
Ekspertlar kursning pasayishini bir qator omillar bilan bog‘lamoqda:
AQSH makroiqtisodiy siyosati
AQSH prezidenti Donald Tramp tomonidan 2025-yil fevral oyida import tariflarining joriy etilishi inflyatsiya bosimining kuchayishi va Federal zaxira tizimi tomonidan foiz stavkalarining oshishi mumkinligi haqidagi xavotirlarni keltirib chiqardi. Bu esa investorlarning riskli aktivlarga, jumladan, kriptovalyutaga bo‘lgan qiziqishini pasaytirdi.
Bybit kripto birjasiga buzib kirish:
Yaqinda Bybit birjasiga qilingan xakerlik hujumi oqibatida taxminan 1,5 milliard dollar miqdoridagi kriptovalyuta o‘g‘irlangani investorlarning raqamli aktivlar xavfsizligiga bo‘lgan ishonchini susaytirdi.
Libra memkoini mojarosi:
Kapitalizatsiyaning 4,5 milliard dollargacha keskin o‘sishidan so‘ng Libra memkoini qiymati 95 foizga tushib ketdi, bu esa investorlarning yangi kriptoaktivlarning barqarorligi va ishonchliligi borasidagi xavotirlarini kuchaytirdi.
Ayni paytda bitkoin 86-89 ming dollar oralig‘ida o‘zgarishda davom etmoqda.
Oxirgi oylardagi bitkoin kursi dinamikasi
2024-yil noyabr. Bitkoin 97 ming dollardan oshib, rekord darajaga yetdi. Bu o‘sish Tramp ma’muriyatining kriptovalyuta siyosati va Federal zaxira tizimining foiz stavkalarini pasaytirishi bilan bog‘liq bo‘lib, investorlarning riskli aktivlarga bo‘lgan qiziqishini oshirdi.
2024-yil dekabr. Noyabr oyida eng yuqori cho‘qqiga erishgandan so‘ng, bitkoin narxi tushishni boshladi va dekabr oyi oxiriga kelib 91 ming dollardan pastga tushdi. Bu pasayish investorlarning foyda olishi va bayramlar davrida savdo faolligining mavsumiy pasayishi bilan bog‘liq bo‘ldi.
2025-yil yanvar. Yil boshida bitkoin yana o‘sib, 100 ming dollar chegarasidan oshdi. Bunga yirik korporatsiyalarning bitkoin xaridlari, jumladan, MicroStrategy kompaniyasining qo‘shimcha 1 ming 20 BTC sotib olgani haqidagi ma’lumotlar sabab bo‘ldi.
2025-yil fevral. Bir oy davomida bitkoin makroiqtisodiy noaniqlik va investorlarning kriptovalyuta bozoriga bo‘lgan ishonchini susaytiruvchi voqealar ta’sirida 90 ming dollardan pastga tushib, beqarorlik ko‘rsatdi.
Izoh (0)