Dunyodagi eng mashhur yutuber, amerikalik Jeyms Stiven Donaldson (Mr.Beast) o‘zining navbatdagi videoshousi uchun Misrning eng taniqli ehromlarini ijaraga oldi. Qadimgi meʼmoriy yodgorliklar ichiga kirish, u yerlarda izlanishlar olib borish va tunab qolish uchun blogerga 100 soat vaqt beriladi.
Jeymsdan qo‘riqlanadigan va davlat muhofazasiga olingan binolarga kirish va suratga olish ishlari uchun qanday qilib ruxsat olgani haqida so‘ralganda, u Misr hukumati bilan hamkorlik qilayotganini aytdi.
Gizadagi ehromlar majmuasi haqiqatan ham turli tadbirlar, konsertlar va hatto festivallar uchun ijaraga olinishi mumkin. Faqatgina to‘y tadbirlari bundan mustasno. Ijaraga berilishdan avval Misr hukumati so‘rovnomalarni o‘rganib chiqadi va katta pul evaziga ehromlarni bir necha kunga topshiradi.
Xeops piramidasi YUNESKOning tarixiy meroslari ro‘yxatiga kiritilgan. Ushbu piramidalar Misr shimolidagi Nil daryosi bo‘yida joylashgan. Misrda kamida 118 ta piramida ma’lum, ammo eng mashhur uchtasi fir’avnlar ismi bilan nomlangan Xeops, Xafra va Mikerin piramidalari hisoblanadi.
Mr.Beast aynan shu uchta mashhur yodgorliklarga kirish va ularda suratga olish uchun ruxsat olgan. Bloger mazkur ehromlar tarixiga oid avval e’lon qilinmagan noyob kadrlarni suratga olishni rejalashtirgan. Uning jamoasi doimiy ravishda professional gidlar hamrohligida bo‘ladi.
“Men hech qachon piramidalar ichida bo‘lmaganman. Men qadimiy ehromlar sirlarini ochib, barcha xonalarni, qabrlarni birma-bir o‘rganmoqchiman. Hozirda qattiq hayajondaman, chunki yer ostida yashirin yo‘llar va turli xatarliklar ham mavjud. Bizni aynan nimalar kutayotganini tasavvur ham qila olmayman. Darvoqe, jamoamiz kun-u tun piramida ichida qoladi va deyarli 4 sutka davomida ehromlar bizning ixtiyorimizda bo‘ladi”, deydi bloger.
Mr.Beast qancha summaga Misr hukumati bilan shartnoma tuzilganini sir saqlamoqda.
Eslatib o‘tamiz, Mr.Beast ekstremal musobaqalar va qimmatbaho sovrinli o‘yinlarni tashkil qilishi bilan mashhur. Uning YouTube kanali 337 milliondan ortiq obunachiga ega. Mazkur ko‘rsatkich dunyo bo‘yicha rekord sanaladi.
Izoh (0)