34 yoshli baliqchi Shon Ing Buyuk Britaniyadagi eng katta laqqa baliqni tutdi. Gigant baliqning vazni 68 kilogramm, uzunligi esa deyarli 2,5 metrni tashkil qiladi.
Baliq shunchalik og‘ir bo‘lib chiqdiki, baliqchilar uni o‘lchashga harakat qilganda tarozidagi ilgak bukilib qoldi. Bundan tashqari, laqqa baliq juda kuchli bo‘lib chiqdi: u qarmoq uchidagi yemni yutib yuborganidan bir yarim soat o‘tgach ham qarshilik ko‘rsatishda davom etgan. Uni bir nechta kishi qirg‘oqqa chiqargan.
Rekordchining so‘zlariga ko‘ra, u bolaligidan baliq ovi bilan shug‘ullanadi. Shon Ing bu sohaga qiziqishiga uning bobosi sababchi bo‘lgan:
“Bu men uchun sevimli hobbi emas, balki shijoat manbayidir”, deydi u.
Uning ovi rekord darajada kattalik bilan baroridan kelishi Ing uchun kutilmagan voqea bo‘ldi. Ammo u bolaligidan mamlakatdagi eng katta baliqni tutishni orzu qilgan. Bunday rekord o‘rnatganini bilgan baliqchi niyati amalga oshganidan juda mamnun.
Ushbu ulkan laqqa baliq 2024-yil sentyabr oyi oxirida, Esseks grafligidagi Maldon shahri yaqinidagi ko‘lda tutilgan, ammo rekord kuni kecha Britaniya Baliqchilik boshqarmasi tomonidan tasdiqlangan.
Ginnes rekordlari kitobiga ko‘ra, musobaqalarda ovlangan eng katta laqqa baliqning vazni 64,86 kilogramm bo‘lgan. Rekord 2011-yilning 18-iyunida Richard Nikolas Anderson tomonidan AQSHning Virjiniya shtatida o‘rnatilgan. Ingning o‘ljasi avvalgi rekorddan deyarli to‘rt kilogramm ortiq, shuning sababli u jahon rekordchilari ro‘yxatiga kirish uchun da’vo qilishi mumkin.
Izoh (0)