Xitoyda rasmiylar aholining qarishiga qarshi chora-tadbirlar rejasini ishlab chiqdi. U tug‘ilish sonini ko‘paytirish maqsadida ota-onalarga bolalar parvarishi uchun subsidiyalar ajratish, maktabgacha ta’lim muassasalarini bepul qilish masalasi o‘z ichiga oladi. Bu haqida Reuters xabar berdi.
Mamlakat aholisi soni 2025-yilga qadar ketma-ket uch yil kamaydi. Rasmiylarning yosh er-xotinlarni turmush qurish va farzand ko‘rishga undashga qaratilgan sa’y-harakatlariga qaramay, nikohlar soni beshdan bir qismga kamaydi. Bu esa mamlakat tarixidagi rekord darajadagi pasayish hisoblanadi.
2035-yilga borib 60 va undan katta yoshdagilar soni 40 foizga ko‘payib, 400 milliondan oshishi kutilmoqda. Bu Buyuk Britaniya va Qo‘shma Shtatlar aholisining umumiy soniga tengdir.
Dunyoning ikkinchi yirik iqtisodiy qudratiga ega bo‘lgan davlat uchun bu vaziyat jiddiy muammo hisoblanadi. Xitoy hukumati eng kam nafaqa miqdorini 20 yuanga (2,75 dollarga) oshirishini ma’lum qilgan.
Shuningdek, qishloq joylarda yashovchi hamda jismoniy imkoniyati cheklangan keksalarga jamoatchilik tomonidan g‘amxo‘rlikni oshirish masalalariga ham alohida e’tibor qaratildi.
Ayniqsa, qishloq joylaridagi bolalar, mehnat muhojirlari farzandlari vahomiladorlikning dastlabki bosqichida bo‘lgan ayollarga g‘amxo‘rlik kuchaytiriladi, deydi rasmiylar.
Xitoydagi demografik tanazzulning aksariyati 1980—2015-yillar oralig‘ida joriy etilgan bir bola siyosati bilan bog‘liq. 2021-yilga kelib esa er-xotinlarga uchtagacha farzand ko‘rishga ruxsat berilgan.
Yosh xitoyliklarning farzand ko‘rish istagi yo‘qligi, asosan, bolalarni tarbiyalash bilan bog‘liq yuqori xarajatlar, turmush qurishni istamaslik yoki oilaning karyeraga salbiy ta’siri borasidagi xavotirlar bilan izohlanmoqda.
Shundan so‘ng rasmiylar er-xotinlarni farzand ko‘rishga undash uchun rag‘batlantirish choralarini ko‘rishga harakat qilgan: tug‘ruq ta’tilini kengaytirish, farzand ko‘rish uchun moliyaviy va soliq imtiyozlari, uy-joy subsidiyalari shular jumlasidandir.
Izoh (0)