16-dekabr kuni sayyoramizdagi eng past bo‘yli ayol Joti Amji 31 yoshga to‘ldi. Hindistonlik ayol uchun bu kun alohida ahamiyatga ega bo‘ldi, chunki u yangi rekordni o‘rnatdi.
Ginnesning rekordlar kitobi rasmiy saytida Joti Amji dunyodagi eng kichik qo‘llarga ega ayol bo‘lgani haqida xabar berildi. Uning chap kaft uzunligi 7,1 santimetr, o‘ng kaft uzunligi esa 7,2 sm.
Rekordchi ayol qo‘llarining o‘lchami Coca-Cola temir bankasining balandligi yoki beysbol to‘pi diametrining yarmiga teng. Shuning uchun barchaga odatiy kattalikda bo‘lgan narsalar Jotining qo‘llarida ulkan ko‘rinadi.
Eslatib o‘tamiz, Joti Amji ilk bor 2009-yilda Ginnesning rekordlar kitobida qayd etilgan. O‘sha vaqtda uning bo‘yi bor-yo‘g‘i 61,8 santimetr edi.
Hozirda uning bo‘yi 62 sm bo‘lib, bolaligida Jotiga axoyedroplaziya tashxisi qo‘yilgan. Rekordchining ovozi yosh qizchalarnikidek ingichka. U o‘zining noodatiy tashqi ko‘rinishi orqali mashhur bloger va aktrisaga aylangan.
Joti o‘zining boshqalarga o‘xshamasligidan qayg‘urmasligiga uning shifokor ota-onasi sababchi. U bolaligidan o‘ziga xos unikal inson ekanligiga ishongan va bu ishonch unga aktrisalik faoliyatini tanlashiga turtki bo‘lgan. Ijtimoiy tarmoq yulduziga aylangan Amji American Horror Story serialida ham suratga tushgan.
Eslatib o‘tamiz, Jyoti Amji Jahon rekordlar kuni 20 yilligi munosabati bilan Londondagi Savoy mehmonxonasida dunyodagi eng baland ayol — 27 yoshli Rumeysa Gelgi bilan uchrashdi. Rumeysaning bo‘yi 215 sm. Unga kamyob kasallik — Uiver sindromi tashxisi qo‘yilgan. Kasallik tananing haddan ortiq tez o‘sishiga va suyak deformatsiyasiga olib keladi.
Izoh (0)