Bugungi kunda turli-tuman yeguliklar-u tezpishar ovqatlar keng ommalashgan. Ulardan biri pitssa barchaga yoqadigan yegulikka aylangan. Quyida pitssa taomi va uning tarixi haqida qiziqarli ma’lumotlar bilan bo‘lishamiz.
- Gvatemalada pitssa vulqon olovida tayyorlanadi.
“Pakaya” Gvatemalada joylashgan sayyoradagi eng faol vulqonlardan biri hisoblanadi. Vulqon muntazam otilib turishiga qaramay, ekstremal alpinistlar ushbu tog‘ga tez-tez chiqib turadi. Tepalikka ko‘tarilish, albatta, ko‘p kaloriyalarni yo‘qotishga va charchoqqa olib keladi. Bu esa vulqon yonida restoran biznesi boshlash uchun ajoyib imkoniyatdir!
Shunday fikrga gvatemalalik oshpaz Mario David Garsiya keldi va vulqonning o‘zida pitssa pishirish g‘oyasini amalga oshirdi. U har kuni maxsus, olovda erimaydigan kiyim-bosh bilan tog‘ga chiqadi va o‘zi bilan pitssa uchun kerakli mahsulotlar solingan 30 kilogrammlik ryukzakni olib yuradi. Vulqon issig‘ida pishirilgan pitssalarni o‘sha yerdan o‘tib ketayotgan sayyohlarga sotadi. U o‘zining ochiq osmon ostidagi restoranini Pizza Pacaya deb ataydi.
- Dunyodagi eng katta pitssa deyarli 1300 kvadrat metrni tashkil etadi.
2012-yil dekabr oyida Rimda 1261,65 kvadrat metr maydonda tayyorlangan pitssa Ginnes rekordlari kitobiga kiritilgan edi. Ushbu pitssa NIPfood restorani bosh oshpazi Dovilio Nardi tomonidan tayyorlangan. Pitssa imperator Oktavian Avgust sharafiga “Ottavia” deb nomlangan va 100 foiz glyutensiz taom bo‘lgan.
Kuni kecha mazkur rekord Airrack taxallusi ostidagi amerikalik bloger va Pizza Hut kompaniyasi tomonidan yangilandi. Ular hamkorlikda Los-Anjeles anjumanlar markazining ulkan zalida 1299,71 kvadrat metr maydonga ega pitssa tayyorladi. Unga 6193 kilogramm xamir, 2244 kilogramm shirin sous, 3992 kilogramm pishloq va 630 496 dona pepperoni bo‘lakchalari sarflandi.
OAVga berilgan taqdimotdan so‘ng pitssa bo‘laklarga bo‘linib, Los-Anjelesdagi xayriya tashkilotlariga yuborildi.
- Pitssa avvallari kambag‘al kishilar taomi bo‘lgan.
Foto: Wikimedia Commons
Xamir ustiga turli mahsulotlar qo‘yib pishirish qadimdan mavjud. Bunday taomlarning ko‘plab misollari bor: Xitoycha bing, Janubiy Osiyoning naan taomi, fransuzcha kish va afrikacha injera kabilar shular jumlasidan. Ularning umumiy jihati shundaki, xamirli taom uchun idish talab etilmas va uni qo‘lda yeyish mumkin bo‘lgan.
Bugungi zamonaviy pitssalar Neapolda 16–17-asrlarda vujudga kelgan. Pitssaga avval Amerikadan ispanlar olib kelgan pomidorlar qo‘shilgan. Bunday taom kam ta’minlanganlar uchun ko‘cha taomlari hisoblangan.
- Bruklinda pitssali qutida pitssa sotiladi
Shon Bertyem o‘zi tug‘ilib o‘sgan Nyu-Yorkning Bruklin rayonida sayr qilib yurgan edi va ko‘chada pitssadan qolgan ko‘plab qutilarga ko‘zi tushdi. Shunda unga ajoyib fikr keldi va Shon o‘zining Vinnie’s Pizzeria tarmog‘ini ochdi. Ushbu kafeda pitssalar yeyish mumkin bo‘lgan pitssali qutilarda sotiladi. Ustidan esa folga qog‘ozi bilan o‘raladi.
- Ba’zan pitssaga noodatiy mahsulotlar, masalan, oltin qo‘shib pishirishadi.
Pitssaga qo‘shiladigan ananas bo‘laklari hozirda hech kimni hayratda qoldirmaydi. Lekin Yevropada ushbu taomga o‘zgacha mahsultolar qo‘shib tayyorlash odati mavjud. Masalan, Shvetsiyada mashhur bo‘lgan Pizza Africana’ga banan, piyoz, yeryong‘oq va tovuq go‘shti qo‘shiladi. Tovuq o‘rniga Afrikaga xos ekzotik go‘sht, masalan, tuyaqush go‘shti bo‘laklari solinishi mumkin.
Shuningdek, Glazgouda bir dona pitssa 4200 dollarga sotilgan. Pizza Royale 007 nomli taom Dom Perignon shampan vinosiga botirilgan qora ikra, 100 yillik konyakda marinadlangan kiyik go‘shti, shotlandcha dudlangan losos balig‘i, yuqori sifatli proshutto va balzamik sirkadan iborat. Bunday pitssaning ustiga susal oltini sepiladi va dasturxonga tortiladi.
Izoh (0)