Afsonaviy bokschi Floyd Meyvezer AQSh prezidenti Donald Trampni “mamlakat tarixidagi eng yaxshi prezident” deb atadi, deya xabar bermoqda DailyMail nashri.
Sportchi avval ham Trampni qo‘llab-quvvatlagan — u 2017-yilda Donaldning prezident lavozimiga tayinlanish marosimida qatnashgan va o‘sha paytda ham uning tarafdori ekanligini bildirgan edi. Bugun esa u Fox Business telekanali bilan suhbatda Tramp haqidagi fikrlarini yana ochiq aytdi.
Ilgari ham Tramp bizga rahbar bo‘lgan edi, lekin biz uni qadrlamadik. Donald — ajoyib rahbar. Mening nazarimda u bizning tarixdagi eng yaxshi prezidentimiz hisoblanadi, dedi Meyvezer.
Amerikada ko‘pchilik bundan norozi bo‘lsa-da, Trampning hokimiyat tepasiga kelishi yaxshi ish bo‘ldi. Sababi Oq uyga kim kelsa ham, fuqarolarning bir qismi doimo norozi bo‘ladi. Menimcha, rahbar lavozimi uchun eng munosib inson Tramp, deya qo‘shimcha qildi sobiq sportchi.
Meyvezerning ushbu fikrlari ijtimoiy tarmoqlarda katta shov-shuvga sabab bo‘ldi. Tramp tarafdorlari bokschining bunday qo‘llab-quvvatlovini iliq qabul qilishdi.
“Buyuk sportchi buyuk insonni tan oladi…”, deb yozdi X (sobiq Twitter) foydalanuvchilaridan biri.
Boshqa bir foydalanuvchi esa “Meyvezer afsona va u haqiqatni ochiq gapirdi”, deya Floydni qo‘llab-quvvatladi.
Meyvezerning so‘zlariga qarshi fikr bildirganlar juda kam bo‘ldi. Asosiy tanqidiy fikrlar shundan iborat bo‘ldiki, Tramp ikkinchi marta prezident etib tayinlanganiga ko‘p bo‘lmagani bois uni tarixdagi eng yaxshi prezident deb atashga hali erta.
Ma’lumot uchun, Floyd Meyvezer professional faoliyati davomida bir nechta vazn toifalarida jahon chempioni bo‘lgan va boks tarixidagi eng muvaffaqiyatli jangchilardan biri hisoblanadi. U Super yengil vazn toifasida WBC jahon chempioni (63 kg), yarim o‘rta vazn bo‘yicha (67 kg) WBC, WBA (Super), IBF bo‘yicha jahon chempioni hisoblanadi. Shuningdek, u o‘rta vaznning ikkinchi yengil toifasi (69,9 kg) WBC va WBA (Super) jahon chempioni bo‘lishni uddalagan. Qolaversa, janglarda ketma-ket 50 marta g‘alaba qozonib, mag‘lubiyatsiz seriya qayd etgan va o‘ziga xos rekord qayd etgan.
Floyd Meyvezerning eng yirik janglari orasida Menni Pakyao, Saul “Kanelo” Alvares, Oskar De La Hoya va Konor Makgregorga qarshi bahslar bor.
Izoh (0)